चैत्र–२७ । धनगढी प्रिमियर लिग (डिपिएल) क्रिकेटको उद्घाटनको मैत्रीपूर्ण खेलमा नेपाल ११ ले धनगढी ११ लाई पराजित गरेको छ । नेपाल ११ ले धनगढीलाई ३१ रनले पराजित गरेको हो । टस जितेर पहिले ब्यटिङ गरेको नेपाल ११ ले निर्धारित २० ओभरमा ८ विकेट गुमाउँदै १ सय ६१ रन बनाएको थियो । टोलीका लागि पारस खड्काले ६८ र बसन्त रेग्मीले ४३ रन बनाए । त्यस्तै जवाफी ब्यटिङमा उत्रेको धनगढीले १ सय ६२ रन पक्ष्याउने क्रममा २० ओभरमा ८ विकेट गुमाउँदै १ सय ३० रनमात्र बनाउन सफल भयो । धनगढीका लागि सुनिल धमलाले ३४ र दिपेन्द्रसिंह ऐरीले २६ रन बनाए । डिपिएलको पहिलो खेल सोमबार बिहान ९ बजे सिवाइसि अत्तेरिया र काठमाडौं गोल्डेन तथा दिउँसो १ बजे रुपन्देही च्यालेन्जर्स र कञ्चनपुर आइकोनबिच खेल हुनेछ । धनगढीमा खेल हेर्न आउने तीन हजार दर्शकसम्म अटाउने अस्थाई प्याराफिट सहितको रंगशाला बनाइएको छ । प्रतियोगितामा ६ टोलीको सहभागिता रहेको छ । प्रतियोगिता विजेताले १५ लाख र उपविजेताले ७ लाख रुपैयाँ नगद पुरस्कार पाउने छन् । खेल हेर्न ३०, ५०, ८० र एक सय रुपैयाँको टिकटको व्यवस्था गरिएको छ ।

उद्घाटन खेल क्रिकेट डिपिएल धनगढी ११ धनगढी प्रिमियर लिग नेपाल ११