चैत्र–३१ । धनगढी प्रिमियर लिग (डिपिएल) क्रिकेटअन्तर्गत बिहीबार भएको खेलमा कञ्चनपुर आइकोनिक ११ रनले विजयी भएको छ । लिगअन्तर्गत भएको खेलमा कञ्चनपुरले धनगढी टिम चौराहाविरुद्धको खेलमा विजयी भएको हो । खेलमा १ सय ६ रनको लक्ष्य पछ्याएको धनगढी १७ दशमलव ४ ओभरमा सबै विकेट गुमाएर ९४ रन मात्र बनाउन सफल भयो । धनगढीको लागि टोलीका कप्तान पारसले सर्वाधिक २३ रन बनाए । त्यस्तै आरिफ शेख २२, पृथु बास्कोटाले १९ र अनिल मण्डलले १२ रन बाहेक अन्यले दोहोरो रन बनाउन सकेनन् । कञ्चनपुरको लागि अभिनाश कर्णले सर्वाधिक तीन विकेट लिए । यस्तै ललित भण्डारी र चन्द्र साउदले समान दुई–दुई विकेट लिए भने सिद्धान्त लोहनी र सुनिल धमलाले एक–एक विकेट लिए । यसअघि टस जितेर पहिले ब्याटिङ गरेको कञ्चनपुरले निर्धारित २० ओभरमा ६ विकेट गुमाएर १ सय ५ रन बनाएको थियो । कञ्चनपुरका लागि सुनिल धमलाले सर्वाधिक ३९ रन बनाए । यस्तै सिद्धान्त लोहनीले २७ रन तथा सागर पुनले २० रन बनाए । धनगढीको लागि रामनरेश गिरी र आरिफ शेखले समान दुई–दुई विकेट लिए भने सुशन भारी र प्रेम तामाङले एक एक विकेट लिएका थिए ।

कञ्चनपुर आइकोनिक क्रिकेट धनगढी टिम चौराहा धनगढी प्रिमियर लिग (डिपिएल)