अनमोलबारे भुवन भन्छन्, ‘मिडियाबाट अनमोललाई मैले लुकाएकै हो’
चर्चित फिल्म नायक भुवन केसी आफ्ना छोरा अनमोलले अभिनय गर्ने फिल्म ‘कृ’मा यति बेला व्यस्त छन् । कृमा अनमोल केसीले २० लाख रुपैयाँ लिएर नेपाली चलचित्र क्षेत्रमा सर्वाधिक पारिश्रमिक लिने कलाकारका रुपमा आफूलाई स्थापित गरिसकेका छन् । ‘कृ’ को सुटिङ वैशाख ६ देखि हुँदैछ । निर्माण अघि नै चर्चा पाएको ‘कृ’ बारे फिल्मका लगानीकर्ता भुवन केसीसँग गरिएको कुराकानीको सम्पादित अंशः
महत्वाकांक्षी फिल्म ‘कृ’ को सुटिङ सुरु हुँदैछ, कतिको आशावादी हुनुहुन्छ ?
फिल्म सुटिङमा जानु अघि नै धेरै गृहकार्य गरेका छौं । गृहकार्य कम भयो भनेर एक महिना सुटिङ सारेर काम गर्यौं । अब भोलि (वैशाख ६) देखि सुटिङ हुँदैछ । चलचित्रमा अहिलेको सफल र लोकप्रिय कलाकार अनमोल केसी हुनुले पनि आशा बढी भएको छ । यो फिल्ममा अहिलेकी सबैभन्दा हिट मोडल अदिती बुढाथोकी नायिका छिन् । फिल्मलाई सुरेन्द्र पौडेलले निर्देशन गर्दै हुनुहुन्छ । म र सुभाष गिरी निर्माता हौं ।
अनमोल हुनु नै फिल्म सफल हुने शर्त हो ?
अनमोलले अहिलेसम्म चार फिल्म गर्यो । उसका चार फिल्म नै सुपरहिट भए । पहिलो फिल्म होस्टेलमा भुवन केसीको छोरा अनमोल भनियो । त्यसपछि उसले आफ्नो नाम आफै कमायो । अहिले अनमोल केसी भन्दा पुग्छ, भुवन केसीको छोरा भनिरहन पर्दैन । उसले जे जति काम गर्छ, अति मेहनत गरेर, कुनै कसर बाँकी नराखी गर्छ । यहि कारण उसले वर्षमा एउटा फिल्म मात्रै गर्छ । यस्तो मेहनती कलाकारले नायक भएर फिल्म खेल्दा कसरी सफल नहोला त ? त्यसमाथि हाम्रो टिम पनि अत्यन्त मेहनती र राम्रो छ ।
अनमोललाई युवती फ्यानहरुले फोन गरेर हैरान पार्छन् भन्ने कुरा छ के हो ?
कुरा साँचो हो । फोन अति नै आउँछ । उसले सिम पनि बदलिरहन्छ । यदि अहिलेको कुरा गर्नु हुन्छ भने त उसले मोबाइल नै बोक्दैन । बिहानैदेखि बेलुकासम्म व्यस्त हुन्छ । फोनमा कुरा गर्न साध्य नभए पनि उसले पटक पटक आफ्ना प्रशंसकहरुलाई सम्मान र माया गरेर सन्देश दिइरहेकै छ ।
तपाईले अनमोललाई मिडिया, फ्यानबाट अहिले टाढा राख्नु भएको छ भन्छन् मानिसहरुले कुरा के हो ?
यो कुरा पनि साँचो हो । म झुठो बोल्दिनँ । अहिले अनमोललाई मिडियाबाट टाढा राखेकै हो । फिल्म कृमा अनमोल नयाँ गेटअपमा आउँदैछ । त्यो गेटअप फिल्ममार्फत नै सार्वजनिक होस भन्ने निर्देशक, निर्माताको चाहना छ । यसकारण उसले अहिले टेलिभिजनहरुमा अन्तर्वार्ता दिएको छैन । पत्रकार साथीहरुले बेला बेलामा खोज्नु हुन्छ । मसँग भएको बेला मेरो मोबाइलबाट उसँग कुरा गराइ पनि दिन्छु । फिल्म राम्रो होस्, व्यवसायिक रुपमा सफल होस्, दर्शकले मनोरञ्जन लिन सक्नुहोस भनेर यसो गरिएको हो ।
फिल्म कृको सुटिङ कति दिनमा सकिन्छ ?
अहिलेको हाम्रो योजना ५५ दिनको हो । यसमा हामीले ठूलो धनराशी खर्च पनि गर्दैछौ । अहिलेको हिसाबले १ करोड ७५ लाख खर्च हुन सक्छ । फिल्मको सुटिङ काठमाडौं, पोखरा, चितवनमा हुनेछ । विदेशमा कतार र मलेसियामा पनि हुन सक्छ ।
‘कृ’ कस्तो खालको फिल्म हो ?
यो मूलत प्रेम कथामा आधारित नै हो ।
आफ्नो जमानामा तपाई पनि खुब रुचाइएको नायक हुनुहुन्थ्यो, अहिले छोराले त्यो स्थान लिँदा कस्तो लागेको छ ?
हेर्नुस्, सबैको एक एक समय हुन्छ । म मेरो समयमा सफल भए । मलाई दर्शकले मन पराउनु भयो । माया गर्नुभयो । मैले पनि उहाँहरुको सम्मानका लागि काम गरे होला । त्यसको पुरस्कार मलाई उहाँहरुले दिनु भयो । अब अनमोलको जमाना आयो । उसले राम्रो गरोस्, सुपर डुपर फिल्म आओस् । राम्रो फिल्म नेपालमै बन्छ भन्ने दर्शकले महशुस गरुन । त्यति भए पुग्छ । अरु के चाहियो र ?
तपाई मोटरसाइकल चढेर त्यो बेला काठमाडौका सडक गल्लीमा आफूलाई फिल्मकै हिरो जस्तो ठानेर हुइँकिनु हुन्थ्यो रे, त्यो देखेर तपाईलाई फिल्ममा अफर आएको भन्ने सुनिन्छ, हो ?
एकदमै हो । त्यो बेला काठमाडौंका सडक गल्लीमा मोटरसाइकल चढेर हिँडनु ठूलो शानको कुरा थियो । त्यो शान मलाई मेरो परिवारले पूरा गरिदिएको थियो । मलाई फिल्मा शौख पनि थियो । मान्छे हेन्डसम थिएँ । मोटरसाइकल चढेर त्यसरी हिँडेको निर्देशक मिनाक्षी आनन्दले देख्नु भएछ । उहाँले नै मलाई जुनी फिल्मको नायकमा अफर गर्नु भयो । मैले हुन्छ भने । त्यसपछि लाइफ त फिल्ममय भइहाल्यो ।
Anmol KC bhuwan kc
