वैशाख–६ । धनगढी प्रिमियर लिग (डिपिएल) क्रिकेटको फाइनलमा विराटनगर किंग्स पुग्न सफल भएको छ । बुधबार भएको पहिलो प्लेअफमा रुपन्देही च्यालेन्जर्सलाई २९ रनले पराजित गर्दै विराटनगर डिपिएलको फाइनलमा प्रवेश गरेको हो । विराटनगर किंग्स्ले दिएको १ सय २९ रनको लक्ष्य पछ्याएको रुपन्देही च्यालेन्जर्सले निर्धा्रित २० ओभरमा सबै विकेटको क्षतिमा ९९ रन मात्रै बनाउन सक्यो । रुपन्देहीका लागि बिक्रम शोबले २३ तथा पुष्प थापाले २२ रन बनाउनु बाहेक अरुले दोहोरो रन बनाउन सकेनन् । विराटनगरका सुशील कँडेलले चार तथा सन्दिप लामिछानेले दुई विकेट लिए । यसअघि पहिले ब्याटिङ गरेको विराटनगरले निर्धा्रित २० ओभरमा ९ विकेट गुमाउँदै १ सय २८ रन बनाएका थियो । विराटनगरका लागि आशिफ शेखले ३४ तथा शरद भेषावकरले २४ रन बनाए । रुपन्देहीका शक्ति गौचनले ३ तथा दिपेश श्रेष्ठले २ विकेट लिएका थिए । रुपन्देही र विराटनगर प्रतियोगितामा पहिलो र दोस्रो स्थानमा रहेर प्लेअफमा पुगेका हुन् । पराजित भएको रुपन्देहीले अब एक पटक प्लेअफ खेल्न पाउने छ ।

क्रिकेट धनगढी प्रिमियर लिग (डिपिएल) प्लेअफ रुपन्देही च्यालेन्जर्स विराटनगर किंग्स