साफ च्याम्पियनसिपको तयारीमा रहेको नेपाली राष्ट्रिय महिला फुटबल टोली मलेसियासँगको दोस्रो अन्तराष्ट्रिय मैत्रीपूर्ण खेलमा पराजित भएको छ ।

बुधबार भएको दोस्रो मैत्रीपूर्ण खेलमा नेपाल घरेलु टोलीसँग ४–१ ले पराजित भएको हो । यसअघिको पहिलो मैत्रीपूर्ण खेल १–१ को बराबरीमा रोकिएको थियो ।
मलेसियास्थित कोटा किनाब्लुस्थित लिकस रंगशालामा भएको खेलमा मलेसियालाई जित दिलाउन शर्लिन एली पिउसले दुई तथा नूराथिरह महट र पुटेरी नोरालिसा विकिल्सनले समान एक–एक गोल गरिन् । नेपालकी साजना रानाले एक गोल फर्काइन् ।

शर्लिनले खेलको चौथो मिनेटमै गोल गरी घरेलु टोलीलाई सुरुवाती अग्रता दिलाएका थिए । खेलको ४२ औं मिनेटमा नूराथिरहले गोल गरेपछि पहिलो हाफमा मलेसियाले २–० को अग्रता लियो ।

खेलको ५० औं मिनेटमा शर्लिनले व्यक्तिगत दोस्रो गोल गरेपछि मलेसियाले ३–० को अग्रता बनायो । ८२ औं मिनेटमा नेपालकी साजना रानाले गोल गरेपछि खेल ३–१ मा पुगेपनि ८८ औं मिनेटमा नोरालिसाले गोल गर्दै मलेसियालाई ४–१ को जित दिलाइन् ।

साफ च्याम्पियनसिपको तयारीका लागि नेपाली टोलि दुई मैत्रीपूर्ण खेलका लागि मलेसिया गएको हो । यस्तै साउथ इस्ट एसियन कपको तयारी गर्न मलेसियाले नेपालसँग मैत्रीपूर्ण खेल खेलेको हो ।

मलेसिया मैत्रीपूर्ण खेल नेपाली राष्ट्रिय महिला फुटबल टोली साफ च्याम्पियनसिप