काठमाडौंः कीर्तिपुरस्थित त्रिवि क्रिकेट मैदानमा जारी प्रधानमन्त्री कप क्रिकेटमा पुलिस क्लबले लगातार दोस्रो जित दर्ता गरेको छ ।

पहिलो खेलमा सुदूरपश्चिमसँग ७ विकेटले विजयी भएको पुलिसले दाेस्राे खेलमा पूर्वाञ्चललाई ९ विकेटले पराजित गरेको छ । पूर्वाञ्चलले दिएको १०५ रनको लक्ष्य पुलिसले १७ दशमलव १ ओभरमा एक विकेट गुमाउँदै पूरा गरेको हो ।

पुलिसको लागि सुनिल धमलाले अविजित ५२ तथा दिलिप नाथले ३६ रनको योगदान दिए । पूर्वाञ्चलको लागि सागल ढकालले एक विकेट लिए ।

यसअघि पहिले ब्याटिङ गरेको पूर्वाञ्चलले ३७ दशमलव १ ओभरमा सबै विकेट गुमाउँदै १०४ रन मात्र बनाउन सफल भयो । पूर्वाञ्चलको लागि मेहवुव आलमले सर्वाधिक ४० रन तथा अमल दासले १३ रन बनाउनु बाहेक अन्य ब्याट्सम्यानले दोहोरो अंक जोड्न सकेनन् ।

पुलिसका लागि सुशील कँडेलले तीन विकेट लिए । त्यस्तै पूर्वाञ्चलले लगातार दोस्रो हार ब्यहोरेको छ । यसअघि प्रतियोगिताको उद्घाटन खेलमा पनि पूर्वाञ्चल आर्मीसँग मात्र १०३ रनमा समेटिएको थियो ।

पुलिस क्लब