वैशाख २२ गते । जिल्लामा पुरुषभन्दा बढी महिला एचआइभी संक्रमित भएको बझाङ जिल्ला स्वास्थ्य कार्यालयले जनाएको छ । प्राप्त तथ्यांकअनुसार जिल्लामा पुरुषभन्दा बढी महिलामा एचआइभीे संक्रमण देखिएको हो । एकसयपन्ध्र एचआइभी संक्रमितमध्ये जिल्लामा ५७ पुरुष र ५८ महिला रहेको एचआइभी काउन्सेलर अरुणा खड्काले बताएका छन् । तीमध्ये नौ एचआइभी संक्रमितको मृत्यु भइसकेको छ । संक्रमितमध्ये तीन बालकलाई उनकै आमाबाट एचआइभी सरेको स्वास्थ्य बताइएको छ । बालबालिका तथा महिलामा बढी एचआइभी संक्रमण हुनुको प्रमुख कारण रोजगारीका लागि छिमेकी देश भारत गएका पुरुषले असुरक्षित यौन सम्पर्क राख्नु र लापर्बाहीका कारण महिला तथा बालबालिका समेत प्रभावित भएको जनस्वास्थ्य अधिकृत दयाकृष्ण पन्तले बताए । जिल्ला जनस्वास्थ्य कार्यालयको तथ्यांकका आधारमा ५८ जनाले मात्र एआरटी सेवा लिइरहेका र बाँकीले सो सेवा लिन नमानेको बताइएको छ । पीडितहरुलाई समाजले चिनेपछि अपहेलित हुने डरले सेवा लिन नमानेको स्वास्थ्यकर्मीको भनाइ छ । जिल्लाको सबैभन्दा बढी संक्रमित रायल गाविसमा नौजना सङ्क्रमित रहेको जनस्वाथ्य अधिकृत दयाकृष्ण पन्तले बताए ।

HIV/AIDS