मुम्बई शानदार जित निकाल्दै प्लेअफमा प्रवेश, दिल्ली १ सय ४६ रनले पराजित
वैशाख–२४ । इन्डियन प्रिमियर लिग (आइपिएल) क्रिकेट अन्तर्गत शनिबार राति भएको खेलमा मुम्बई इन्डियन्सले दिल्ली डेयरडेभिल्सविरुद्धको खेलमा शानदार जित दर्ता गरेको छ । मुम्बईले खेल १ सय ४६ रनले जितेको हो । जित पछि मुम्बर्इ तीन खेल अगावै प्लेअफमा प्रवेश गरिसकेकाे छ । फिरोज शाह कोट्ला रंगशालामा भएको खेल आइपिएलको यस वर्षको प्रतिस्पर्धामा अहिलेसम्मकै ठूलो रन अन्तरको जित हो । मुम्बईले प्रस्तुत गरेको दुई सय १३ रनको लक्ष्य पछ्याएको दिल्लीले १३ दशमलव ४ ओभरमा सबै विकेट गुमाएर ६६ रन मात्र बनाउन सफल भयो । दिल्लीको लागि करुण नायरले २१ तथा कारी एन्डरसन र प्याट कमिन्सले समान १० रन बनाउनु बाहेक अन्यले दोहोरो रन जोड्न सकेनन् । मुम्बईको लागि हरबजन सिंह र कर्ण शर्माले तीन–तीन तथा लासिथ मालिंगाले दुई विकेट लिए । टस हारेर पहिले ब्याटिङ गरेको मुम्बईले निर्धारित २० ओभरमा मात्रै तीन विकेट गुमाउँदै दुई सय १२ रन बनायो । उसका लागि लेन्डल सिमोन्सले ६६, किरोन पोलार्डले नटआउट ६३, हार्दिक पाण्डेयले नटआउट २९ तथा पार्थिव पटेलले २५ रन बनाए । जितपछि शीर्ष स्थानमा रहेको मुम्बईको ११ खेलबाट १८ अंक भएको छ । ११ खेलबाट ८ अंकसहित छैटौं स्थानमा रहेको दिल्लीलाई भने प्लेअफमा पुग्ने यात्रामा धक्का लागेको छ । इन्डियन प्रिमियर लिग (आइपिएल) क्रिकेट दिल्ली डेयरडेभिल्स
