जेठ २७ । प्राकृतिक स्रोत द्वन्द्व रुपान्तरण संवाद समितिको चौथाैँ स्थापना दिवसका उपलक्ष्यमा समितिले सुनसरी जिल्लामा प्राकृतिक द्वन्द्व रुपान्तरणका पक्षमा चार महिनाको अवधिमा भएका कार्यक्रमको समीक्षा बैठक त्यहाँ आज(शनिबार) आयोजना गरियो ।

देशको विभिन्न १७ जिल्लाको जल जमिन र जङ्गललगायतका विषयसँग सरोकार राखेर विगत लामो समयदेखि स्थानीय समुदायमा सिमाना क्षेत्र, प्राकृतिक स्रोतको बाँडफाँड, उपभोग र त्यसको भोगचलन लगायतका विषयमा लामो समयदेखि उत्पन्न द्वन्द्व वा विवाद समाधान गर्ने कार्यमा सफलता प्राप्त गर्दैआएको यस समितिले सुनसरीमा पनि धेरै समस्याको समाधान गरेको छ ।

प्राकृतिक सम्पदाको सिमाना क्षेत्र तथा स्वामित्व विवाद समाधान गरी एक आपसमा मेलमिलाप गराउँदै आएको समितिले सुनसरी जिल्लाको जल जमिन जङ्गलसँग सम्बन्ध राख्ने धेरै द्वन्द्वको सहजीकरण गरेर मिलाप गराइसकेको छ ।

जल जमिन र जङ्गल सम्बन्धी द्वन्द्व व्यवस्थापनमा सक्रिय सुनसरीकी राष्ट्रिय स्रोतव्यक्ति कृष्ण राईले सुनसरीमा पाँचवटा भन्दा बढी द्वन्द्वको व्यवस्थापन गरी १२ वटा त्यस्ता द्वन्द्व सम्बन्धी घटनाको अभिलेखिकरण गरेर ती समस्याको निरुपण गर्ने अभियान चलाइरहेको बताए । उनले समितिले नेपालका १७ जिल्लामा ९५ वटा द्वन्द्व सम्बन्धी घटना मिलाउने कार्य गरेको जानकारी दिए ।

बैठकमा अभियानको क्षेत्रीय निर्देशक हिम डिसीले जल जमिन र जङ्गलबाहेक अन्य प्राकृतिक स्रोत सम्बन्धी विवाद वा द्वन्द्वलाई व्यवस्थापन गर्दै यसको दिगो समाधानका लागि समितिले सक्रिय पहल गर्दैआएको बताए ।

जिल्ला समन्वय समितिका कार्यक्रम अधिकृत भेषराज घिमिरेको अध्यक्षतामा बसेको बैठकले सुनसरी जिल्लाको विभिन्न सामुदायिक वन, तालतलैया, बर्जुताल र धरानको सर्दू जलाधार क्षेत्रलगायतका विषयमा पछिल्लो समयमा उत्पन्न विवाद र समस्याको सुक्ष्म अध्ययन गरेर त्यसको समाधान निकाल्ने विषयमा पनि वृहत छलफल गरेको छ ।

सो अवसरमा जिल्ला बार एसोसिएसनका अध्यक्ष राजु ढकाल, जिल्ला वन कार्यालयका वीरेन्द्र महासेठ, सिँचाइ डिभिजन कार्यालयका इन्जिनियर विष्णु चौधरी, सामुदायिक वन उपभोक्ता जिल्ला महासङ्घका टेकबहादुर तामाङ, जिल्ला शान्ति समितिका संयोजक डम्बर बुढाथोकी र अग्रज पत्रकार याम प्रधानलगायतले प्राकृतिक स्रोतमाथिको विवाद लगायतका विषयलाई गम्भीरतापूर्वक लिनुपर्नेमा जोड दिए ।

sunsari