डा. राजेश अहिराज
राष्ट्रिय जनता पार्टी नेपालले पछिल्लो समय गरेको अपराध भनेको अरुको अधिकार खोस्ने प्रयास हो । आफू प्रधानमन्त्रीको निर्वाचनमा मत हाल्न लाइन लाग्ने अनि जनताले भोट हाल्ने बेलामा बष्किार, बिथोल्ने जस्ता कार्यक्रम सार्वजनिक गर्नु राजपाको राजनीतिक बेइमानी र राजनीतिक अराजकता हो ।

राजपाले निर्वाचनमा भाग नलिँदैमा उसको एजेन्डा रहिरहने र निर्वाचनमा भाग लिनेको एजेन्डा समाप्त हुनृ भन्ने हुँदैन । त्यसमाथि निर्वाचन भनेको कुनै दल र व्यक्तिको मात्रै सरोकारको विषय होइन । यो त राष्ट्रिय सरकारको विषयहो । स्थानीय तहको निर्वाचनसँग राजपाका कुनै पनि मागको सम्बन्ध छैन । यसकारण यो तहको निर्वाचन बिथोल्ने कार्यक्रम सार्वजनिक गर्न आवश्यक छैन ।

स्थानीय तहको यो निर्वाचनले जनताको घरदैलोमा सिंहदरबार ल्याइदिन्छ । भूमिको कारोबार, नागरिकता, नागरिक अधिकारका कैयन विषयहरु स्थानीय तहबाटै हुन्छन् । जनतासँग प्रत्यक्ष जोडिएको यस्तो निर्वाचनलाई राजपाले बिथोल्ने प्रयास गरेर गलत संस्कारको विकास गर्न खोजेको जस्तो देखेको छु ।

राजपाले निर्वाचनमा भाग लिनु पर्ने थियो । भाग नलिए पनि ‘अरुलाई पनि भाग लिन दिँदैनौ, जनतालाई पनि मत हाल्न दिँदैनौं’ भन्ने प्रकारको दम्भ राजपाले नराखेको भए हुने थियो ।

राजपाले भनेर प्रदेश २ को निर्वाचनको मिति सारिएको कुरा छ । तर राजपाले त्यो होइन भन्छ । यदि राजपाले भनेकै भरमा निर्वाचनको मिति सारिएको हो भने यो गम्भीर राजनीतिक गलत संस्कारको सुरुवात हो भन्ने बुझ्नु पर्छ । किनकी आज राजपाले चुनाव सार्नु भन्दा प्रदेश २ को चुनाव सार्ने, भोलि एमालेले प्रदेशको सारौं भन्ला, पर्सि माओवादीले केन्द्रको चुनाव सारौं भन्ला, के यसरी राजनीति चल्छ ? यो गलत नै हो । गलतलाई यो वा त्यो तर्क दिएर ठिक मान्न सकिन्न ।

राजपाको ‘डबल स्ट्याण्ड’ पनि देखिन्छ । उनीहरु सरकारलाई समर्थन गरेर सत्तापक्षको बेञ्चमा बस्छन् । अर्को तिर जनतामा जाँदा प्रतिपक्षी हौं भनेर प्रस्तुत हुन्छन् । सत्ता पक्षीय दलले त सरकारले गरेको निर्णयलाई मान्नु पर्‍यो नी । नमान्ने भए समर्थन फिर्ता लिनु पर्छ । तर राजपा दुवै गर्दैन ।

निर्वाचनको मिति नसार्दा राजापा प्रदेश नम्बर २ बाट पनि बढारिन्थ्यो । भाग नलिएपछि पार्टी जनताबाट बढारिन्छन् । मानिसहरुले राजपालाई जोगाउनका लागि सरकारले प्रदेश २ को निर्वाचन मिति सारेको हो कि ? भन्ने प्रश्न पनि सोध्ने गरेका छन् ।

सरकारको काम दल जोगाउने होइन, देश जोगाउने हो । यसकारण म भन्छु राजपाको घुर्कीमा सरकार धेरै फस्यो । सरकारले त सहजकर्ताको भूमिका निर्वाह गरेर चुनाव गराउनु पथ्र्यो । सबै राजनीतिक पार्टी जनताकै बीचमा हुन्छन् भन्ने हुँदैन । निर्वाचन आयोगमा मात्रै दर्ता भएर बसेका कैयन पार्टी छन् । हो राजपाको स्थिति पनि त्यो आउन सक्छ ।

मानिसहरु राजपाले निर्वाचन बिथोल्ने आँकलन गर्छन् । हतियार भएको शक्ति विप्लवको माओवादीले त निर्वाचनलाई २० बाट १९ मा झार्न सकेको छैन भने राजपा नेपालले के गर्न सक्छ ? राजपाको बिथोल्ने हैसियत नै छैन । पहिलो चरणमा एकैपटक देशभर चुनाव गरको भए पनि केही फरक पर्नेवाला थिएन । सरकार डराएर मात्रै हो । नत्र अहिलेसम्म देशभर स्थानीय तहको निर्वाचन सकिएर जनप्रतिनिधिले काम गर्न थालिसकेका हुने थिए ।

मैले यो कुरा अनुमानको भरमा भनेको होइन । मैले तराइका धेरै जिल्लाको भ्रमण गरेर आए पछि भनेको हो । अझ प्रदेश नम्बर २ मा त अझै मजाले म घुमेको छु । मलाई सबै वस्तुस्थिति थाहा छ । चुनाव हुन नसक्ने कुनै कारण थिएन । तर सरकारले बिना कारण चुनाव तेस्रो चरणमा पुर्यायो ।

विषयको निष्कर्ष के हो भने राजपा नेपाल यदि यो देशप्रति जिम्मेवार छ भने उसले कुनै जात, समुदाय, क्षेत्रलाई होइन पूरै देशलाई केन्द्रमा राखेर राजनीति गर्नु पर्यो ।
(मधेस मामिला जानकार डा. अहिराजसँग गरिएको कुराकानीमा आधारित)