(योग दिवसका अवसरमा क्यान्सर जितेकी वलिउड फिल्म नायिका मनिषा कोइरालाले जीवनोपयोगी धेरै टिप्सहरु दिएकी छन् । उनले आफ्नो मन्तव्यका क्रममा व्यक्त गरेका धारणाको छोटो अंश निम्नानुशार छ ।)

जब मलाई स्वास्थ्यले चुनौती दियो, त्यसपछि मेरो एक नयाँ अध्याय सुरु भयो । म त्यस्तो मानिसहरु मध्येमा पर्थेँ, जो स्वास्थ्यमा खासै वास्ता गर्दैन थिए । मेरो पनि अस्वस्थ जीवनशैली थियो । जब काठमाडौंको नर्भिक अस्पतालमा मलाइ क्यान्सर भएको पत्ता लाग्यो, त्यसपछि मेरो जीवनको मोड नै बदलियो ।

किमोथेरापीको पीडादायी उपचार मैले गरेँ । धेरै पैसा पनि खर्च भयो । जीवनमा थोरै मानिसहरुले गर्ने अनुभव मैले पनि गरेँ । समग्रमा भन्नु पर्दा त्या एक अत्यन्त पीडादायी घटना थियो । मान्छेलाई प्रकृतिले नै धेरै कुरा दिएको हुन्छ । त्यस्ता उपहारलाई जोगाएर राख्नु पर्छ । त्यो मध्येको स्वास्थ्य पनि हो । मैले स्वास्थ्यको महत्व कहिले बुझिनँ । तर जब यसले मलाई छाडेर जान खोज्यो, अनि मैले जोगाउन धेरै संघर्ष गरेँ ।

मानिसका जीवनका कैयन आयामहरु हुन्छन् । शरिरमात्रै मानिसको स्वास्थ्यको विषय होइन । शरिर–सोच–आत्मा जस्ता विषयहरु हुन्छन् । यतितिर म अहिले जान चाहन्न । शारिरीक र मानसिक स्वास्थ्यका लागि योगको महत्व धेरै छ भन्ने विषयमा केन्द्रीत हुन चाहन्छु ।

दैनिक ८ देखि ९ घण्टाको निद्रा, शाकाहारी भोजन त्यसमा पनि वनस्पतिबाट प्राप्त हुने खानेकुराहरु खान जरुरी छ । हाम्रो शरिरमा ७० प्रतिशत त पानी हुन्छ । यसकारण पानी पनि महत्वपूर्ण हुन्छ स्वास्थ्यकालागि । अर्को कुरा हो सकारात्मक सोचको । तर हाम्रो दिमागले जहिले पनि नकारात्मक घटना नै सम्झन चाहन्छ । विगतमा तपाइको जीवनमा भएका घटना सम्झनु पर्‍यो भने पहिले नराम्रा घटना नै दिमागमा आउने गर्छन् ।

डकैती, चोरी, हत्या जस्ता समाचारहरु बिकाउ पनि हुन्छन् ।

तनावपूर्ण जीवन शैलीले पनि मानिसलाई रोगी बनाउँछ । तनावबाट मुक्त हुनका लागि योग एक महत्वपूर्ण विधि हुन सक्छ ।