पश्चिम बंगालको नेपाल–भारत सीमावर्ती मिरिक बजारमा सोमबार राति प्रहरीको गोलीबाट एक जना गोर्खाल्याण्ड पक्षधरको मृत्यु भएको छ । योसँगै गोर्खाल्याण्ड आन्दोलनमा मारिनेको संख्या आठ पुगेको छ ।

पछिल्लो पटक भारतीय अर्धसैनिक बल सीआरपीएफको गोलीबाट मिरिकको मकरजुङ गाउँका ४५ वर्षीय आशीष तामाङको मृत्यु भएको हो । स्थानीय पत्रकार मनोहर शर्माका अनु्सार, गोर्खाल्याण्डको पक्षधर गोर्खा जनमुक्ति मोर्चा र तृणमुल कांग्रेसका कार्यकर्ताबीच झडप हुन खोज्दा सीआरपीएफले चलाएको गोलीबाट तामाङको मृत्यु भएको हो ।

सो घटनामा पाँच जना भन्दा बढी घाइते भएका छन् । गम्भीर घाइतेलको दार्जिलिङ र मिरिक अस्पतालमा उपचार भइरहेको छ । पत्रकार शर्माका अनुसार, सोमबार दिउँसो मिरिक नगरपालिका–५ को कृष्णनगरको प्रहरी बुथमा अज्ञात समूहले आगजनी गरेको थियो । सो घटनालाई लिएर मोर्चा र तृणमुल कांग्रेसका कार्यकर्ताबीच एकले अर्कालाई आगजनीको आरोप लगाएका थिए ।

आगजनीको विरोधमा साँझ गोर्खाल्याण्ड मुभमेन्ट कोअर्डिनेशन कमिटीमा आवद्ध दलका कार्यकर्ताले निकालेको -यालीमा सहभागी र तृणमुल कांग्रेसका कार्यकर्ताबीच झडप हुन लागेपछि सुरक्षाकर्मीले हस्तक्षेप गरेको थियो । यसअघि गोर्खाल्याण्ड आन्दोलनका क्रममा सुरक्षाकर्मीको गोलीबाट ७ जना सर्वसाधारणको मृत्यु भइसकको छ । मृत्यु हुनेमा टासी भुटिया, सुरज सुन्दास, समीर गुरुङ, अशोक तामाङ, विमल गजमेर, सुनिल राई र महेश गुरुङ छन् ।