एक बंगलादेशी किशोर पेटमा झुन्डिएको फुटबल आकारजस्तो हर्नियाका कारण साधारण मानिसझैं जीवनयापन गर्न र स्कुल जानका लागि संघर्ष गरिरहेका छन् ।
मोहम्मद सबुझ नाम गरेका ती १३ वर्षीय किशोरको पेटमा झुन्डिएको फुटबल आकारजस्तो हर्निया दिन–प्रतिदिन बढ्दै जान थालेपछि उनी आफ्नो भविष्यप्रति धेरै निराश बनेको बताउँछन् ।

जन्मजात नै उनको पेटमा हर्निया देखापरेको थियो । मोहम्मदको परिवारलाई गरिबीले गाँजेको छ ।उनको यो दुःखद् हालत देखेर एकजना सामाजिक कार्यकर्ताले सम्बन्धित निकायलाई सहयोग गर्न झक्झकाएपछि उनको अवस्था बाहिर आएको हो ।

मोहम्मदका पिता नोरुल इस्लाम मजदुरीको काम गर्छन् । बंगलादेशको दक्षिण भागमा अवस्थित सिरजगोंगमा बसोबास गर्ने नोरुलले आफ्नो सबैभन्दा प्यारो छोरो कुनैपनि कामका लागि सक्षम नभएको बताउँछन् ।

मोहम्मदको विषयमा समाचारहरु बाहिर आउन थालेपछि बंगलादेशका स्वास्थ्य अधिकारीहरुले उपचारका लागि आवश्यक तयारी अगाडि बढाएको बताएका छन् ।
नोरुलकाअनुसार मोहम्मद अहिले राजधानी ढाकामा गएर आवश्यक परीक्षणका लागि सरकारी अधिकारीहरु कुरिरहेका छन् ।

ढाका मेडिकल कलेजका चिकित्सकहरुले भनेका छन्–‘स्थानीय अस्पतालको परीक्षण रिपोर्टअनुसार मोहम्मदलाई कमैमात्र देखिने जटिल प्रकारको ‘भेन्ट्रल हर्निया’ भन्ने रोग लागेको छ ।’

यो रोगलाई साधारणतयाः सामान्य हर्नियाकोरुपमा मानिसहरुले बुझ्ने गरेका छन् । चिकित्सककाअनुसार पेटको भित्तामा हुने मांसपेसीको कमजोरीका कारण पेटका स्नायुहरु फुल्ने गर्दछ ।

स्वास्थ्य अधिकारीहरुलाई मोहम्मदको निःशुल्क उपचार गर्न सामाजिक कार्यकर्ता ममुन विश्वासले दबाब दिएका थिए । उनी यसै वर्षको सुरुतिर केही सहयोग रकम लिएर मोहम्मदका पिता नोरुललाई भेट्न पुगेका थिए ।

साथीभाइहरुले गिज्जाएपछि स्कुल जानसमेत समस्या आएको बताउँछन्, नोरुल । उनले स्कुलमा आफ्नो छोराका लागि शिक्षा महत्वपूर्ण रहेको बताउँदै उपचारमा सहयोग गर्न र पढ्ने वातावरण मिलाइदिन याचनासमेत गरेका थिए ।