बागलुङ, ९ साउन । बागलुङको बडिगार्ड गाउँपालिका ५ ग्वालीचौरमा सोमबार विहान जीप दुर्घटना हुँदा चार जनाको घटनास्थलमै मृत्यु भएको छ भने ६ जना घाइते भएका छन् । जीप सडकदेखि आठ सय मिटर तल खसेको थियो ।

बडिगार्ड गाउँपालिका–८ रणसिंहकिटेनीदेखि खर्वाङ बजारका लागि छुटेको ध १ ज १८४ नम्बरको जीप दुर्घटना हुँदा बर्डिगार्ड–४ जलजलाका ४२ वर्षीय होमेन काउचा, सोही स्थानका ३६ वर्षीय नरबहादुर शेर्वुजा, ३५ वर्षीय तुलबहादुर पुन र बडिगार्ड–५ ग्वालीचौरका ६० वर्षीय मुक्ति पाइजाको मृत्यु भएको गाउँपालिका अध्यक्ष मेयरसिंह पाइजाले जानकारी दिए ।

घाइते हुनेमा एकै घरका बलमति पाईजा उनकी छोरी दीपशिखा पाइजा, दिनेश पाइजा, सोही स्थानका टेकबहादुर पाइजा र जलजलाका भीमबहादुर श्रीस रहेका छन् । घाइतेमध्ये टेकबहादुर र दीपशिखाको अवस्था गम्भीर रहेको अध्यक्ष पाइजाले जानकारी दिए । घाइतेको उपचार गर्न हेलिकोप्टरको माग गरिएको छ ।