काभ्रेपलाञ्चोक, १२ साउन । एकै परिवारका चार जनाले सामूहिक आत्महत्या गरेको केही दिनमै एक दम्पतीले रूखमा झुन्डिएर आत्महत्या गरेका छन् ।

धुलिखेल नगरपालिका–८ बस्ने वर्ष ३० का भैरव भनिने सोमप्रसाद बडाल र उनकी १८ वर्षीया श्रीमती मनीषा दाहालले एउटै रूखमा पासो लगाएर आत्महत्या गरेका हुन् । एकै रूखमा झुन्डिएको अवस्थामा उनीहरूको शव फेला परेको जिल्ला प्रहरी कार्यालय काभ्रेका प्रहरी निरीक्षक रविराज थपलियाले जानकारी दिए । ‘धुलिखेल–८ बडालगाउँको भाँटपोखरीमा उनीहरूले एउटै पासो लगाएर आत्महत्या गरेका हुन्,’ प्रहरी निरीक्षक थपलियाले भने ।

पनौती–काठमाडौं रुटको गाडीमा काम गर्ने बडालसँग काभ्रे क्याम्पसमा अध्ययन गर्दागर्दै मनीषाले एक वर्षअघि प्रेम विवाह गरेकी थिइन् । त्यसविरुद्ध सौताले बहुविवाहको उजुरीसमेत गरेकी थिइन् । जेठी श्रीमतीबाट एक छोरा र छोरी भए पनि बडालले केही महिनाअघि कान्छी श्रीमती भिœयाएपछि उनको परिवारमा कलह सुरु भएको थियो । केही दिनअघि जेठी श्रीमतीले लगाएको मकैबारीसमेत बडालले फाँडिदिएका थिए ।

मकैबारी फाँडिदिएको भन्दै उनकी जेठी श्रीमती टीकादेवी बडालले केही दिनअघि सुरक्षाको माग राखी जिल्ला प्रहरी कार्यालय काभ्रेमा निवेदनसमेत दिएकी थिइन् । सोही निवेदनका आधारमा प्रहरीले कारबाहीका लागि भन्दै जिल्ला प्रहरी कार्यालयमा लगेर एक रात थुनेको समेत थियो ।

‘जेठी श्रीमतीको निवेदन पेस गरेपछि प्रहरीले बडाललाई मंगलबार नियन्त्रणमा लिएर बुधबार छाडेको थियो,’ प्रहरी निरीक्षक थपलियाले भने । बुधबार बेलुका जेठी श्रीमती टीकामाया बडाललाई खाना बनाउँदै गर्नु भनेर निस्किएका उनीहरू घरबाट २ सय मिटर तल बनमा झुन्डिएको अवस्थामा भेटिएका थिए । एउटै रूखमा झुन्डिएको अवस्थामा बिहीबार साँझ शव फेला परेको थियो । प्रहरीले शवलाई पोस्टमार्टमका लागि धुलिखेल ल्याएको छ । घटनाका विषयमा अनुसन्धान भइरहेको प्रहरीले जनाएको छ ।

यसअघि काभ्रेको बनेपा बसपार्कस्थित एक होटलमा एकै परिवारका चार जना मृत भेटिएका थिए । बसपार्कमा होटल (गौतम भोजनालय) सञ्चालन गर्दै आएका बनेपा–२ टुकुचा नाला निवासी ३२ वर्षीय राजाराम दाहालसहित उनका ६५ वर्षीय बाबु हरिभक्त दाहाल आमा हरिमाया दाहाल र २५ वर्षीया बहिनी रञ्जना दाहाल एक साताअघि मृत भेटिएका हुन् । प्रहरीका अनुसार घटनास्थलमा सेलफस विषको भाँडो भेटिएको थियो ।