असार १९ । रोमाञ्चक टेलिभिजन सिरिजकाका रुपमा ख्याती कमाएको रोडिजको पहिलो नेपाली संस्करण सोमबारदेखि हिमालय टेलिभिजनमार्फत प्रशारण हुँदैछ ।

युवा पुस्तामा लोकप्रिय यो कार्यक्रम ‘हिमालय रोडिज’ को नामले प्रशारण हुनेछ । आश्चर्यजनक लोकेसन, साहसिक र चुनौतीपूर्ण प्रतिस्पर्धा रोडिजमा हुने भएकोले यस कार्यक्रमको अन्तर्राष्ट्रिय ब्रान्ड स्थापित भएकोछ । हिमालय टेलिभिजनले रोडिजको फ्रान्चाइज भायाकम एटिनमार्फत लिएको हो । हिमालय रोडिजको अडिसन पाँच महिना अघि पोखरा, बुटवल, चितवन, धरान र काठमाडौंमा भएको थियो ।

एमटिभी रोडिजबाट मनोरञ्जन लिइरहेका नेपाली दर्शकलाई नेपाली संस्करणले पनि उत्तिकै मनोरञ्जन दिने कार्यक्रमका निर्देशक अमनप्रताप अधिकारीको दाबी छ । निर्देशक अधिकारीले भने, ‘पात्र र परिवेश फरक हुन्छ । मेकिङमा कुनै सम्झौता गरिएको छैन । गुणस्तरमा धेरै ध्यान दिइएको छ । यसकारण कार्यक्रम दर्शकलाई गुणस्तरीय लाग्छ भन्नेमा हामी आशावादी छौं ।’

कार्यक्रमको यो सिजनमा ¥यापर आशिष राना (लाहुरे), अभिनेत्री दिया मास्के र मिडिया पर्सनालिटी रेमनदास श्रेष्ठ निर्णायकका रुपमा प्रस्तुत हुँदैछन् ।  कार्यक्रमका बिजेताले नगद २० लाख र एक बजाज एभेन्जर बाइक पनि पाउनेछन् ।

हिमालय टेलिभिजनको रोडिज अघि नै एपीवान टेलिभिजनले नेपाल आइडल कार्यक्रम सुरुवात गरिसकेको छ । हिमालय रोडिज र नेपाल आइडल दुवै फ्रान्चाइज कार्यक्रम हुन् ।