सातदोबाटोस्थित एन्फा कम्प्लेक्समा जारी साफ यू–१५ च्याम्पियनसिपअन्तर्गत पहिलो खेलमा नेपालले माल्दिभ्सलाई ६–० ले पराजित गरेको छ ।

नेपालको जितको लागि ब्रिजेश चौधरीले दुई तथा दर्शन गुरुङ, रोशन रानामगर, आकाश बुढा मगर र रोशन दोङले एक–एक गोल गरे ।

नेपालले पहिलो हाफमै माल्दिभ्सविरुद्ध ४–० को अग्रता लिएको थियो । खेलको १० औं मिनेटमा ब्रिजेशले गोल गर्दै नेपाललाई सुरुवाति अग्रता दिलाएका थिए । त्यसको १० मिनेटमै दर्शनले गोल गरे । कप्तान रोशनले ३६ औं मिनेटमा पाएको पेनाल्टीमार्फत गोल गर्दै अग्रता तेब्बर बनाए । आकाशले ४५ औं मिनेटमा गोल गर्दै नेपाललाई पहिलो हाफमै ४–० को अग्रता दिलाए ।

दोस्रो हाफको सुरुवातमै रोशनले नेपालको अग्रता बढाएका थिए । ब्रिजेशले ७३ औं मिनेटमा गोल गर्दै नेपाललाई ६–० को अग्रता दिलाए । सुरुवात देखिनै दबाबमा परेको माल्दिभ्सले भने खेल अवधि भर केही मौका बनाए पनि गोलमा परिणत भने गर्न सकेन ।

जितसँगै नेपाल समूह ‘बी’ बाट प्रतियोगिताको सेमिफाइनलमा प्रवेश गरेको छ । समूह विजेताको लागि भने नेपालले बुधबार भारतसँग सामना गर्दैछ ।

football u-15 saff championship nepal