काठमाडौं । यू–१५ साफ च्याम्पियनसिप फुटबलको आज हुने फाइनल भिडन्तमा पुनः परिचित प्रतिद्वन्द्वी नेपाल र भारत भिड्दैछन् ।

एन्फा कम्प्लेक्स सातदोबाटोमा हुने यी दुई बिचको भिडन्त निकै रोचक हुने देखिएको छ । लिग चरणमा समूह ‘बी’बाट प्रतिस्पर्धा गरेका दुवै टोली समूह विजेता र उपविजेता बन्दै सेमिफाइनलमा पुगेका थिए ।

समूह चरणमा नेपालले भारतसँग २–१ गोलको हार व्यहोरेको थियो । यद्यपि फाइनलमा उही प्रतिद्वन्द्वी पाएको नेपाललाई अघिल्लो खेलको गल्ती सच्याएर उपाधि घरमै राख्ने उचित मौका मिलेको छ ।

नेपालले सेमिफाइनलमा बंगलादेशलाई ४–२ गोलले हराएको थियो । भारतले भने भुटानलाई २–० गोलले हराएर नेपालसँगको उपाधि भिडन्त पक्का गरेको थियो ।