इंग्लिस प्रिमियर लिग फुटबल अन्तर्गत आइतबार राति भएको खेलमा म्यानचेस्टर युनाइटेडले जित दर्ता गरेको छ ।

म्यानचेस्टर युनाइटेडले घरेलु मैदान वल्ड ट्राफोर्डमा एभर्टनलाई ४–० ले पराजित गरेको हो । यहि सिजन युनाइटेडबाट एभर्टन फर्किएका वायने रुनीले आफ्नो पूर्व क्लबविरुद्ध पहिलो पटक खेलेका हुन् । युनाइटेडको जितको लागि एन्टोनियो भ्यालेन्सिया, हेनरिक एमखिर्तयान, रामेलु लुकाकु र एन्थोनी मार्सलले गोल गरे ।

खेलको चौथो मिनेटमै भ्यालेन्सियाले गोल गर्दै युनाइटेडलाई सुरुवाति अग्रता दिलाए । पहिलो हाफमा १–० को अग्रता लिएको युनाइटेडले दोस्रो हाफमा थप तीन गोल गर्दै ४–० को जित निकाल्यो । दोस्रो हाफको ८३ औं मिनेटमा एमखिर्तयान, ८९ औं मिनेटमा लुकाकु र इन्जुरी समयमा पाएको पेनाल्टीमा मार्सलले गोल गरे ।

जितसँगै युनाइटेड ५ खेलबाट १३ अंकका साथ दोस्रो स्थानमा छ । समान अंक भएको म्यानचेस्टर सिटी भने शीर्ष स्थानमा रहेको छ । पाँच खेलबाट चार अंक मात्र जोड्न सफल एभर्टन भने १८औं स्थानमा छ ।