काठमाडौं । नेपाल खेलकुद पत्रकार मञ्चले आयोजना गर्ने पल्सर स्पोट्र्स अवार्डको १४ औ संस्करणको चार विधाको मनोनयन सार्वजनिक भएको छ ।

भदौ २६ गते राजधानीमा हुने अवार्डका लागि वर्षका उत्कृष्ट महिला खेलाडी, पुरुष खेलाडी, युवा खेलाडी र प्रशिक्षकको मनोनयन सार्वजनिक भएको हो । महिलातर्फ एथलेटिक्सकी कान्छीमाया कोजु र सरस्वती भट्टराई, आर्चरीकी ज्ञानु अवाले, ब्याडमिन्टनकी नङ्सल तामाङ्ग र फुटबलकी सावित्री भण्डारी मनोनयनमा परेका छन् ।

पुरुषतर्फ फुटबलका किरणकुमार लिम्बु, ब्याडमिन्टनका रत्नजित तामाङ्ग, क्रिकेटका शरद भेषावकर, एथलेटिक्सका सोमबहादुर कुमाल र भलिबलका मानबहादुर श्रेष्ठ मनोनयनमा परेका छन् ।

युवा खेलाडीमा क्रिकेटका दिपेन्द्र सिंह ऐरी, फुटबलका अनन्त तामाङ, जुडोकी मनिता श्रेष्ठ, भारोत्तोलनकी कमला श्रेष्ठ तथा भलिबलकी प्रतिभा माली रहेका छन् ।

प्रशिक्षकतर्फ फुटबलबाट ग्योतोकु कोजी र मेघराज केसी, एथलेटिक्सबाट पुष्पराज ओझा, क्रिकेटबाट जगत टमाटा तथा ब्याडमिन्टनबाट किरण थापा रहेका छन् ।

मञ्चले पिपुल्स च्वाइस अवार्डको मनोनयन सार्वजनिक गरिसकेको छ । ८ विधामा पुरस्कृत गरिने अवार्डका उत्कृष्ट पुरुष तथा महिला खेलाडी, पिपुल्स च्वाइस र प्रशिक्षकलाई पल्सर मोटरसाइकल प्रदान गरिने छ । अन्य विधाका बिजेताले ५० हजार रुपैयाँ प्राप्त गर्ने छन् । लाइफटाइम अचिभमेन्ट, पारा एथलिट र स्पेशल अवार्ड भने भदौ २६ गते अवार्ड समारोहमै घोषणा गरिने छ । मञ्चले तयारी अन्तिम चरणमा पुगेको जनाएको छ ।