ऋषि कपूरलाई क्यान्सर भएको भन्ने खबरबारे रणधीर कपूरले भने, ‘यो समयमा यस्ता आंकलन गरिनु गलत’
नयाँ दिल्ली । के ऋषि कपूरलाई क्यान्सर भएको हो ? के उनी क्यान्सरको तेस्रो स्टेजको उपचार गर्न अमेरिका गएका हुन् ? यस्ता प्रश्नहरू सामाजिक सञ्जालमा चर्को रूपमा उठ्न थालेका छन् । यसैबीच ऋषि कपूरका दाजु रणधीर कपूरले एक अन्तर्वार्तामा यसबारे स्पष्टिकरण दिएका छन् ।
उनले भने, ‘ऋषि कपूरको हालत एकदम ठिक छ । उनको टेस्ट शुक्रबारबाट सुरू हुन्छ । जबसम्म टेस्ट हुँदैन, तबसम्म हामी उनलाई के भएको भन्नेबारे स्पष्ट भएर भन्न सक्दैनौं । यस्ता सबै आंकलनलाई म खण्डन गर्न चाहन्छु । यो हाम्रो लागि एकदम नराम्रो समय हो । भर्खरमात्र हामीलाई मातृशोक भएको छ, यसबीच ऋषिलाई लिएर यस्ता आंकलन गरिनु नराम्रो हो ।’
सोमबार ऋषि र रणधीरकी आमा कृष्णा राज कपूरको हृदयघातका कारण मृत्यु भयो । उपचारका लागि अमेरिका पुगेका ऋषि अन्तिम संस्कारमा सामेल हुन सकेनन् । उनकी पत्नी नीतू कपूर र छोरा रणवीर कपूर पनि यतिबेला उनीसँगै अमेरिकामा छन् । यतिबेला ऋषिको उपचार त्यही अस्पतालमा भइरहेको छ, जहाँ अभिनेत्री सोनाली बेन्द्रेले क्यान्सरको उपचार गराएकी थिइन् ।
