विराटनगर आइपुग्यो भारतीय रेलको इन्जिन
मोरङ । विराटनगरमा पहिलो पटक भारतीय रेल पुगेको छ । भारतको बथनाहाबाट विराटनगरको बुद्धनगर(१८ सम्म बिछ्याइएको रेल्वे लिकको परिक्षणका लागि पहिलोपटक भारतीय रेलको इन्जिन विराटनगर आइपुगेको हो ।
भारतको रेल्वे विभागका इन्जिनियरिङ र निर्माण कम्पनीको टोलीले रेलमार्ग निर्माणको केही समय अघि जाँच गरेसँगै आइतबार परिक्षण स्वरुप यहाँसम्म रेल गुडाइएको हो ।
भारत सरकारले मोरङको कटहरीसम्म ब्रोडगेज रेलमार्ग निर्माण गरिदिने नेपाल सरकारसँग भएको सम्झौताअनुसार निर्माण कार्य गरेको थियो।
भारत सरकारले ४ अर्ब ४८ करोडको लागतमा बथनाहादेखि कटहरीसम्म रेलमार्ग निर्माण गरेको हो। नेपाल सरकारले जग्गा उपलब्ध गराउने र भारत सरकारले भौतिक पूर्वाधारलगायतको काम गरिदिने गरी द्विपक्षीय सम्झौता भएको थियो।
रेलमार्ग निर्माणका ठेक्का पाएका इरकोण इन्टरनेसनल फार्बिसगन्ज, भारतले यसअघि नै अक्टोबरसम्ममा विराटनगर रेल आइपुग्ने बताएको थियो।
