काठमाडौं । कलाकार विपिन कार्कीको अभिनय रहेको पछिल्लो फिल्म ‘गोपी’ को पोस्टर बुधबार सार्वजनिक भएको छ । रिलिज भएका सबै पोस्टरमा विपिनको मुख्य उपस्थिति छ भने एउटा पोस्टरमा मात्र चलचित्रका दुई अभिनेत्री वर्षा राउत र सुरक्षा पन्त देखिएका छन् ।

 

आरोही केसीको लगानीमा दीपेन्द्र लामाले निर्देशन गरेको यस चलचित्रमा विपिनले एउटा किसानको भूमिका निभाका छन् । पोस्टरमा उनको पेशा झल्किने गरी गाई र दूधको क्यानलाई मुख्य प्राथमिकताका साथ देखाइएकोे छ । फिल्म आउने माघ १८ मा रिलिज हुने पक्का भइसकेको छ ।

 

टौवा क्रियसनका विजय बस्यालको डिजाइन रहेको ‘गोपी’ का पोस्टरहरु मोलिक र नवीन छन् । एकै प्रकारको पोस्टर आइरहेका बेला यो चलचित्रको पोस्टरहरु केही फरक बनाउँदा, धेरैपछि मन परेको निर्माण पक्षले बताए ।

 

अभिनेता कार्कीको सडक दुर्घटनाका कारण यसै हप्ता गाई फार्ममा लगेर फोटो सुट गरिएकाले चलचित्रको पोस्टर निर्धारित समयभन्दा ढिलो रिलिज गरिएको हो ।

 

आरोही इन्टरटेनमेन्टको ब्यानरमा बनेको उक्त चलचित्रको कथा सामिप्यराज तिमल्सिनाले लेखेका छन् । त्यस्तै कार्यकारी निर्माता श्रीधर पौडेल, छायांकार शैलेन्द्र डी कार्की र सम्पादक निमेष श्रेष्ठ रहेका छन् ।