काठमाडौं । इटालियन सिरी ए मा लिग लिडर युभेन्टसले टोरिनोलाई हराएको छ ।  शनिबार राति भएको खेलमा युभेन्टसले टोरिनोलाई १–० गोलअन्तरले पराजित गरेको हो । युभेन्टसको जितमा क्रिष्टियानो रोनाल्डोले गोल गरे ।

 

निक्कै प्रतिस्पर्धात्मक रहेको खेलमा पहिलो हाफमा दुवै टोलीबाट कुनै गोल हुन सकने । दोस्रो हाफको खेलमा भने युभेन्टसलाई टोरिनोले रोक्न सकेन । 

खेलको ७०औं मिनेटमा युभेन्टसले पेनाल्टी पाएको थियो । पेनाल्टीबाट रोनाल्डोले गोल गर्दै युभेन्टसलाई अग्रता दिलाए । त्यसपछि खेलमा कुनै गोल हुन सकेन र युभेन्टसले एक शून्यले खेल आफनो पक्षमा बनायो । 

शनिबार राति नै भएको अर्को खेलमा इन्टर मिलानले उडिनेसलाई १–० गोलले नै पराजित गरेको छ ।

 

जितपछि शीर्ष स्थानमा रहेको युभेन्टसले १६ खेलबाट ४६ अंक बनाएको छ । पराजित टोरिनोको भने २२ अंक रहेको छ । लिगको दोस्रो स्थानमा भने नेपोली रहेको छ । उसको १५ खेलबाट ३५ अंक रहेको छ । लिगको तेस्रो स्थानमा रहेको इन्टर मिलानको भने १६ खेलबाट ३२ अंक रहेको छ ।