काठमाडौं । यो हप्ताको लागि दुई फिल्म एकसाथ प्रदर्शनमा आएका छन् । शुक्रबारबाट ‘शेरबहादुर’ र ‘पटुकी’ फिल्म प्रदर्शनमा आएका हुन् । ‘शेरबहादुर’ मा सुनिल थापा, कर्मा शाक्य, मेनुका प्रधान, रविन्द्र झा लगायतका कलाकारहरुको जमघट छ भने ‘पटुकी’ मा ‘परदेशी’ गर्ल रजनी केसी लिड रोलमा छिन् ।

प्रियिमरमा उत्कृष्ट तारिफ पाएको ’शेरबहादुर’ मल्टिप्लेक्स लक्षित फिल्म हो । एक हलिउड फिल्मबाट प्रभावित यो फिल्मलाई मल्टिप्लेक्समा गएको हप्ता प्रदर्शनमा आएको बलिउड फिल्म ‘पद्मावत’ बाधक बन्न सक्ने चलचित्रकर्मीको विश्लेषण छ । 

 

फिल्मलाई आर राजवंशीले निर्देशन गरेका हुन् । धिराज प्रोडक्सनको व्यानरमा निर्मित यो फिल्ममा प्रमोद क्षेत्रीको कथा छ । फिल्ममा गौरीशंकर धुनुजु र धिराज राजवंशीको लगानी रहेको छ । 

 

यस्तै, नारीप्रधान फिल्म बताइएको ‘पटुकी’ मा जेम्स विसी, निर्माता म्याक्टेन कालु, दिपक कँडेल, रोजी श्रेष्ठ, हरि गुरुङ लगायतका कलाकारहरुको पनि मुख्य अभिनय छ ।  म्याक्टेन कालुको निर्माणमा बनेको यस फिल्मका सह–निर्मातामा बिर्जन मिजार र कार्यकारी निर्मातामा शिता मिजार रहेका छन् । 

 

सिंगल थिएटर लक्षित ‘पटुकी’ मा राजनराज सिवाकोटीको संगीत, माक्तेन कालुको शब्द, अभिषेक पौडेलको सम्पादन, सानु कुमार महर्जनको द्वन्द, शिव वि.क.को करियोग्राफी र लक्ष्मण घिमिरेको छायांकन छ । फिल्मका निर्देशक राम नेपाल रहेका छन् ।