काठमाडौं । नेपालमा उत्पादित विद्युत खपत बढाउन इन्डक्सन चुलोको प्रयोग बढाउने तर्फ नेपाल विद्युत प्राधिकरणले विशेष योजना तयार पारेको छ ।

 

ऊर्जामा मुलुकलाई आत्मनिर्भर बनाउने उद्देश्यले विद्युतीय सवारी साधनका साथमा इन्डक्सन चुलोको प्रबर्द्धन गर्ने योजना कार्यकारी निर्देशक कुलमान घिसिङले तयार पारेका हुन् । एलपीजी ग्यासभन्दा इन्डक्सनबाट खाना पकाउँदा सस्तो पर्ने उनको भनाइ छ ।

 

प्राधिकरणाकाे याे निर्णयले पेट्रोलियम पदार्थको आयातमा भर्इरहेकाे उच्च व्यापार घाटा कम हुने विश्वास लिर्इएकाे छ । इन्धन आयात घटाएर विद्युत् खपत बढाउँदा व्यापार घाटा कम गर्न ठूलो योगदान पुग्ने घिसिङको भनाइ छ ।

 

राजधानीमा बिहीबार बारबारा फाउन्डेसनले आयोजना गरेको कार्यक्रममा बोल्दै घिसिङले भारतबाट आयातीत ग्यास र पेट्रोलभन्दा विद्युतबाट फाइदा रहेको उल्लेख गरे । ‘एलीपीजी ग्यासबाट १० लिटर पानी उमाल्न १७ रुपैयाँ खर्च हुन्छ, विद्युत् प्रयोग गर्ने हो भने १० रुपैयाँमै पानी उमाल्न सकिन्छ,’ उनले भने ।

 

अहिले प्राधिकरणले भारतबाट करिब चार सय मेगावाट बिजुली आयात गरिरहेको छ । प्राधिकरणका अहिले ३४ लाख घरेलु ग्राहक छन्, जसले बत्ति बाल्न मात्र विद्युतको बढी प्रयोग गर्छन् ।

 

Kulman Ghising