काठमाडौं । विश्वकप छनोट प्रतियोगिता खेल्न शनिबार जिम्बाब्वे जाने नेपाली क्रिकेट टोलीलाई प्रधानमन्त्री केपी शर्मा ओलीले बिदाइ गरेका छन् ।

 

बिहीबार बालुवाटारमा आयोजित कार्यक्रममा खेलाडीहरुले भने प्रधानमन्त्री ओलीलाई जन्मदिनको शुभकामना दिएका छन् । २००८ फागुन ११ मा तेह्रथुमको इवामा जन्मिएका ओलीले बिहीबार ६७ औं वर्षमा प्रवेश गरेका हुन् ।

 

साे कार्यक्रममा प्रधानमन्त्री ओलीले जन्मदिनको केक काटेर सुरुमा कप्तान पारस खड्कालाई खुवाएका थिए । उनले पूर्व घोषणाअनुसार डिभिजन टू खेलेका नेपाली टोलीका सदस्यहरुलाई जनही ३ लाखको चेक पनि हस्तान्तरण गरेका छन् । 

 

कार्यक्रमलाई सम्बोधन गर्दै कप्तान पारसले सम्पूर्ण खेलाडीहरुको तर्फबाट जन्मदिनको शुभकामना दिएका हुन् । उनले प्रधानमन्त्रीकाे कार्यकालभित्रै एउटा क्रिकेट रंगशाला निर्माणका लागि पहल गर्न अनुराेध गरेका छन् ।