गएराति स्पेनिस ला लिगामा शीर्ष स्थानमा रहेको बार्सिलोनाले जिरोनालाई ६–१ को फराकिलो अन्तरले पराजित गरेको छ । बार्सिलोनाको जितमा लुइस स्वारेजले ह्याट्रिक गरे भने लियोनल मेस्सीले दुई गोल गरे ।

 

बार्सिलोनाको घरेलु मैदानमा खेलिएको सो खेलमा जिरोनाले सुरूमै अग्रता लिए पनि त्यसको दुई मिनेटमै मेस्सीको पासमा स्वारेजले गोल गर्दै खेल बराबरी ल्याए ।

बार्सिलोनाले पहिलो हाफमै थप तीन गोल गर्न सफल रह्यो । मेस्सीले खेलको ३० औं तथा ३६ औं मिनेटमा सुन्दर फ्रिकिक गोल गरे भने स्वारेजले खेलको ४४ औं मिनेटमा गोल गर्दै स्कोर ४–१ बनाएका थिए ।

 

खेलको ६६ औं मिनेटमा फिलिप काउटिन्होले बक्सबाहिरबाट आकर्षक गोल गरे भने ७६ औं मिनेटमा स्वारेजले पुन गोल गर्दै आफ्नो ह्याट्रिक र बार्सिलोनाको फराकिलो जित सुनिश्चित पारे ।

 

यस जितसँगै बार्सिलोनाको २५ खेलमा ६५ अंक छ । दोस्रोमा रहेको एट्लेटिको म्याड्रिडको २४ खेलबाट ५५ अंक रहेको छ भने तेस्रो स्थानमा रहेको रियल म्याड्रिडको २५ खेलमा ५१ अंक रहेको छ ।