भक्तपुर । शिक्षा सचिव मधुप्रसाद रेग्मीले प्राविधिक शिक्षा तथा व्यावसायिक तालिम परिषद् (सीटीईभीटी)ले सीपयुक्त जनशक्ति निर्माणका लागि क्षमता विकास र रोजगारीलाई जोड दिनुपर्ने बताएका छन् ।

 

सीटीईभीटीको ३० आँैं वार्षिकोत्सवमा उनले श्रम बजारमा सहजै बिक्न सक्ने र पूँजी निर्माणमा सहयोग गर्न सक्ने जनशक्ति उत्पादन गरी देशलाई समृद्घ बनाउन सीटीईभीटीको महत्वपूर्ण भूमिका रहनुपर्ने बताए । ‘अब सिटिइभिटीले आवश्यकता पहिचान र म्यापिङ गरेर स्थानीय स्रोत, साधन र प्रविधि परिचालनमा जोड दिनुपर्छ’, उनले बताए ।

 

कार्यक्रममा प्राडा सुरेशराज शर्माले युवालाई सीप दक्षताको डिग्री दिइनुपर्नेमा जोड दिए ।

 

सीटीईभीटीका सदस्य सचिव पुष्परमण वाग्लेले सात वटै प्रदेशमा अधिकारसम्पन्न प्रादेशिक कार्यालय स्थापना गरी कम्तीमा एउटा नमूना प्राविधिक शिक्षालय स्थापना गर्ने तयारी भएको बताए । उनले भने, ‘अब सातै प्रदेशमा एकएक वटा मोडेल पोलिटेक्निक बनाउने नीति बजेटमा छ, सातै प्रदेशमा नयाँ संस्था बनाउनेभन्दा पनि भएकालाई छनोट गरी सुधार गरिनेछ, सीप दिन योजना निर्माणसहित शिक्षा मन्त्रालय, योजना आयोग र अर्थलगायत अन्य मन्त्रालयसँग सीटीईभीटीको नेतृत्वले लबिङ शुरु गरिसकेको छ ।

 

उनले प्राविधिक शिक्षा तथा व्यावसायिक तालिमका क्षेत्रमा कलम चलाउने केन्द्रका एक पत्रकार र सात प्रदेशबाट एकएक गरी आठ जनालाई वार्षिक रुपमा पुरस्कृत गरिने घोषणा गरे ।

 

त्यस अवसरमा प्रशासन महाशाखा प्रमुख रमेश बखती, फोरम फर हेल्थ एण्ड साइन्सका अध्यक्ष कश्यप पौडेल, कर्मचारी संघका अध्यक्ष देवदत्त बडूलगायतले प्राविधिक शिक्षाको एउटै मूलद्वार हुनु आवश्यक रहेकामा जोड दिए ।

 

कार्यक्रममा उत्कृष्ट कर्मचारी, विद्यार्थी र सेवानिवृत्त कर्मचारीलाई पुरस्कार तथा सम्मान दिइएको थियो । रासस