दयाहाङ र प्रियंकाको फिल्म ‘ह्याप्पी डेज’ को प्रदर्शन मिति यस कारण सर्याे
बलिउड फिल्मका कारण नेपाली फिल्महरुको मिति परिवर्तन गर्नुपरेका थुप्रै उदाहरण छन् । केहि दिन अघिमात्र ‘पद्मावत’ का कारण माघ १२ गतेबाट रिलिज डेट पोस्टपोन्ड भएको अभिनेता दयाहाङ राई र अभिनेत्री प्रियंका कार्की स्टारर फिल्म ‘ह्याप्पी डेज’ को प्रदर्शन मिति फेरि फेरबदल भएको छ ।
माघ १२ गतेबाट चैत १६ गतेलाई प्रदर्शन मिति तय गरिएको यो फिल्म अब दुई साता अगाडि अर्थात, चैत २ गते नै प्रदर्शनमा आउने भएको छ । प्राप्त जानकारी अनुसार, चैत १६ गते बलिउड स्टार टाइगर श्राफ अभिनीत फिल्म ‘बागी २’ रिलिज हुने भएपछि ‘ह्याप्पी डेज’ को रिलिज अगाडि सरेको हो ।
नयाँ प्रदर्शन मिति घोषणा सँगै निर्माण पक्षले कभर भिडियो प्रतियोगिता पनि आब्हान गरेको छ । जसमा सहभागी हुन इच्छुकले फिल्ममा समावेश ‘चेप्टे चेप्टे’ गीतमा कभर भिडियो बनाउनु पर्ने छ । कभर भिडियो जुनसुकै युट्युब च्यानलबाट अपलोड गरिए पनि त्यसको लिंक ‘हयाप्पी डेज’ को अफिसियल फेसबुक पेजमा पठाउनु पर्ने छ ।
युट्युबमा सर्वा्धिक भ्युज पाउने भिडियोलाई निर्माण पक्षले विजेता घोषणा गरि १ लाख नगद पुरस्कार प्रदान गर्ने छ । कभर भिडियो प्रतियोगिताको अन्तिम समय फागुन मसान्तसम्म छ ।
