निर्देशक मदन घिमिरेको निर्देशनमा नयाँ फिल्म ‘द प्रिन्स’ निर्माण हुने भएको छ । सोमवार राजधानीमा एक कार्यक्रमका बीच कलाकार र निर्माण टिमको उपस्थितिमा फिल्मको औपचारिक निर्माण घोषणा गरियो । एन.पी. फिल्मस् प्रोडक्शनको ब्यानरमा निर्माण हुने फिल्मका निर्माता विष्णु सिवाकोटी रहेका छन् ।

 

नयाँ कलाकारहरुको बाहुल्यता रहने फिल्मको कथा संगीतकार सम्राट थापाले लेखेका छन् । सरोज खनालको प्रमुख भूमिका रहने फिल्ममा प्रिन्स थापा, शिवु शाह, कशिश दाहाल, मनिषा पाण्डे, निशा केसी लगायतको पनि अभिनय फिल्ममा हेर्न सकिन्छ ।

आधुनिक परिवेश, प्रेम, रोमान्स, मनोरञ्जनका साथै घात, विश्वास, त्याग र रहस्यको सेरोफेरोमा ‘द प्रिन्स’ निर्माण हुने निर्देशक घिमिरेले जानकारी दिए । रामशरण उप्रेतीको छायांकन रहने ‘द प्रिन्स’ मा कविराज गहतराजको नृत्य निर्देशन, सम्राट बस्नेतको द्वन्द्व र भोजराज देवकोटाको पटकथा रहनेछ ।