काठमाडाैं । फिल्म ‘कृ’ को दोस्रो गीत सार्वजनिक भएको छ । फिल्म रिलिज हुन केहि दिन मात्र बाँकी रहँदा निर्माण यूनिटले अनमोल र नव–नायिका अदिती बुढाथोकी फिचरिङ रोमान्टिक गीत सार्वजनिक गरेको छ । 

 

सोमवार राजधानीमा एक कार्यक्रमका बीच सार्वजनिक गरिएको ‘मैले जानी नजानी’ बोलको गीतमा रोदित भण्डारीको स्वर, रोदितकै शब्द तथा रोदित र विशेष पाण्डेको संगीत छ । पुरुषोत्तम प्रधानको छायांकन रहेको यो गीतको भिडियोलाई विक्रम लामा र एन्जिलिना खत्रीले कोरियोग्राफी गरेका हुन् ।

 

गीतको भिडियोमा अनमोल र अदिती रोमान्टिक मूडमा देखिएका छन् । हालैमात्र ३ दिन लगाएर स्कटल्याण्डमा खिचिएको गीतको लोकेशन र छायांकन पक्ष अब्बल छ । यो गीतले पनि फिल्मको व्यापारमा ठूलो सहयोग पुग्नेमा निर्माण यूनिट विश्वस्त देखिएको छ ।

 

सुवास इन्टरटेन्मेन्टको ब्यानरमा तयार भएको फिल्मको प्रस्तुतकर्ता द सुपर काजोल फिल्मस् हो । फिल्ममा सुवास गिरी र भूवन केसीको लगानी छ । कमल गिरी कार्यकारी निर्माता रहेको फिल्मका सह–निर्माता श्री पराजुली हुन् ।

फिल्ममा अनमोल र अदितीको साथमा अनुप विक्रम शाही, कामेश्वर चौरासिया, सरोज खनाल, लक्ष्मी गिरी, रुपा राना लगायतका कलाकारको मुख्य भूमिका छ ।

 

यसै हप्ताको शुक्रवारबाट यो फिल्म देशैभर सोलो रिलिज हुँदैछ । महंगो लागत र युवा स्टार अनमोल केसी जोडिएका कारण पनि यो फिल्म निर्माण अगावैदेखि प्रतिक्षीत थियो ।  यसअघि फिल्मको ट्रेलर र ‘यति यति पानी’ बोलेको गीत सार्वजनिक भइसकेको छ ।