एजेन्सी । टि–ट्वान्टी ट्राइ सिरिज क्रिकेटको दोस्रो खेलमा अष्ट्रेलियाले जित हात पारेको छ । ग्लेन म्याक्श्वेलले उत्कृष्ट प्रदर्शन गर्दै नटआउट शतकीय पारी खेलेपछि अष्ट्रेलियाले इंग्ल्याण्डलाई ५ विकेटले पराजित गरेको हो ।

 

बेलिराइभ ओभलमा १५६ रनको चुनौति पछ्याउदै ब्याटिङ गरेको घरेलु टोली अष्ट्रेलियाले १८.३ ओभरमा ५ विकेटको क्षतिमा लक्ष्य पुरा गर्यो‍ । अष्ट्रेलियाका लागि म्याक्श्वेलले उत्कृष्ट प्रदर्शन गरे । उनले शतकीय पारी खेल्दै आफ्नो टिमलाई महत्वपूर्ण जित दिलाउन सफल भए ।

 

५८ बलको सामना गर्दै म्याक्श्वेलले नटआउट १०३ रन बनाएका थिए । उनले १० चौका र ४ छक्का प्रहार गरे । शतक प्रहार गरेसँगै टि–ट्वान्टी अन्तर्राष्ट्रियमा म्याक्श्वेलको २ शतक भएको छ । यसअघि उनले श्रीलंका विरुद्ध १४५ रन बनाएका थिए ।

 

४ रन हुदा महत्वपूर्ण २ विकेट गुमाएको अष्ट्रेलियाका लागि म्याक्श्वेलले इनिङ्स उकासेका थिए । अष्ट्रेलियाका लागि डि आर्सी शर्टले ३० रन बनाएका थिए ।