स्वान्सी सिटीले विपक्षीको पोस्टमा गोलको वर्षा गर्याे
एफए कप फुटबलको चौथो चरणको रिप्ले अन्तर्गत मंगलबार राति भएको खेलमा स्वान्सी सिटीले लिग टु क्लब नोट्स काउन्टीमाथि ८–१ को शानदार जित दर्ता गरेको छ ।
चौथो चरणको खेलमा बराबरी भएपछि रिप्ले भएको हो । तर मंगलबार राति भएको रिप्लेमा नोट्स काउन्टी निकै कमजोर देखियो । प्रिमियर लिग क्लब स्वान्सी सिटीले पहिलो हाफमा चार तथा दोस्रो हाफमा थप चार गोल गर्यो ।
नोट्स काउन्टीका लागि पहिलो हाफमा नुर हसिनले एक गोल गरे । स्वान्सीका लागि टमी अब्राहामले १८ र पहिलो हाफको इन्जुरी समयमा तथा नेथन डायरले २० र ३० औँ मिनेटमा गरी दुई दुई गोल गरे ।
यस्तै कायल नोग्हटनले ५३, वेन रुटलेजले ५७, टम क्यारोलले ६५ तथा ड्नियल जेम्सले ८२ औँ मिनेटमा एक एक गोल गरे । नोट्स काउन्टीका लागि ३५ औँ मिनेटमा नुर हसिनले एक गोल फर्काए । ८–१ को जितसँगै स्वान्सीले पाँचौँ चरणमा स्थान पक्का गरेको छ ।
यस्तै राति नै भएको खेलमा अतिरिक्त समयमा बरेमिङ्हम सिटीलाई ४–१ ले हराउँदै हडर्ल्सफिल्ड टाउनले पनि पाँचौँ चरणमा स्थान पक्का गरेको छ । यस्तै मिलवाललाई १–० ले हराएको रुचडेलले पनि पाँचौँ चरणमा स्थान पक्का गरेको छ ।
