शनिबार जिम्बाबेको बुलावायोस्थित एथ्लेटिक क्लबको मैदानमा आमनेसामने हुँदा दुवै देशलाई जित्नैपर्ने दबाब हुनेछ । तर यो दबाब नेपाललाई धेरै हुनेछ । प्रतियोगितामा यसअघिका दुवै खेल हारेको नेपाललाई आजको खेल जित्दै सुपरसिक्सको सम्भावना कायमै राख्नुपर्ने चुनौती छ ।

त्यसो त यसअघिका तीनै खेल हारेको अफगानिस्तानलाई पनि आज कम दबाब भने हुने छैन । प्रतियोगिताकै उपाधि विजेताका रुपमा चर्चा बटुलेर जिम्बाबे पुगेको अफगानिस्तान समूह चरणका सबै खेल हारेर घर फर्किन चाहँदैन र यसका लागि आज उसलाई अन्तिम अवसर प्राप्त हुनेछ ।

 

त्यसो त सुपरसिक्समा पुग्ने अफगानिस्तानको गणितीय सम्भावना पनि बाँकी नै छ । अफगानिस्तानले नेपाललाई हराएमा, हङकङ जिम्बावेसँग पराजित भएमा र नेपालले हङकङलाइ हराएमा समूह ‘बी’ बाट सुपरसिक्समा पुग्ने तेस्रो देश अफगानिस्तान, नेपाल र हङकङ जुन पनि हुन सक्छ । 

यस्तो अवस्थामा नेपालका लागि अफगानिस्तानको खराब लय र अफगानिस्तानका लागि अहिलेसम्मको हेड टू हेडको नतिजाले प्रेरणा दिनेछ । 

खेल बुलावायोस्थित एथ्लेटिक क्लबको मैदानमा नेपाली समयअनुसार दिउँसो सवा १ बजे सुरु हुनेछ ।

 

यसअघिका दुवै खेल नेपालले क्विन्स स्पोर्टस क्लबको मैदानमा खेलेको थियो भने नेपालका लागि यो पनि नौलो हो । पूर्वनिर्धारित खेल तालिकाअनुसार यस खेल पनि क्विन्स स्पोर्टस क्लबमै हुनुपर्ने थियो । तर, आर्इसीसीले सुरक्षाको कारण देखाउँदै अन्तिम समयमा खेलस्थल परिवर्तन गरेको हो  । 

नेपाल र अफगानिस्तान ५० ओभरको खेलमा अहिलेसम्म ७ पटक खेलेका छन् । जसमा नेपाल एकपटक मात्र विजयी भएको छ । सन् २००४ को एसीसी ट्रफीमा पहिलो पटक अन्तर्राष्ट्रिय क्रिकेटमा आएको अफगानिस्तानलाई नेपालले ४७ रनले पराजित गरेको थियो । त्यसयताका ६ भेटमा नेपालले अफगानिस्तानलाई हराउन सकेको छैन ।

 

सन् २००६ को एसीसी ट्रफीमा ६४ रनले हारेको नेपालले २००८ को सोही प्रतियोगितामा ३ विकेटले पराजित भएको थियो । २००८ कै विश्व क्रिकेट लिग डिभिजन फाइभमा पनि नेपाल अफगानिस्तानसँग ३७ रनले पराजित भएको थियो ।

 

त्यस्तै सन् २०१० को एसीसी एलिट ट्रफीमा ९५ रन, २०१३ को इमर्जिङ टिम्स कपमा ३ रन र २०१४ को एसीसी प्रिमियर लिगमा १०४ रनले नेपाल पराजित भएको थियो । त्यसयता एकदिवशीय हुँदै टेष्ट मान्यता पाएको अफगानिस्तान र नेपाल एकदिवशीयमा अहिलेसम्म खेलेका थिएनन् ।

 

अफगानिस्तानका विस्फोटक ब्याट्सम्यान मोहम्मद सहजाद टिममा हुने छैनन् । उनी जिम्बावेविरुद्धको खेलमा खेल नियमविपरीत व्यवहार गरेको भन्दै आर्इसीसीले उनलाई २ खेलको प्रतिबन्ध लगाएको छ ।

 

यसैपनि ब्याटिङको समस्या झेलिरहेको नेपाली टोलीका लागि टेष्ट मान्यता पाइसकेको अफगानी बलर नेपालका लागि चुनौती बन्न सक्छन् ।

जिम्बाबेसँगको खेलमा केही सुधार भएको झल्को दिए पनि नेपाली ब्याट्स्म्यानले स्कटल्याण्डसँग त्यसअनुसारको प्रदर्शन गर्न सकेनन् ।

क्रिजमा टिक्न नसक्ने छवि बनाइरहेको ओपनिङ लाइनअप र धर्मराउने मध्यक्रम दुवैका लागि आजको दिन परीक्षा हो ।

 

ब्याटिङले साथ दिए नेपाली बलरले आफ्नो धर्म निर्वाह गर्ने विश्वास गर्न सकिन्छ ।