लगानीअनुसारको उत्पादन नबढेपछि बारा र पर्साका किसानले उत्पादन बढाउन कृषि औजारको प्रयोग गर्ने थालेका छन् । 

लागतभन्दा बढी उत्पादन लिई आर्थिक रुपमा सबल बनाउने साइत जुराइदिएको छ– वीरगञ्जस्थित कृषि औजार अनुसन्धान केन्द्रले । 

अहिलेको परिस्थितिमा श्रमिकको अभाव र लागत खर्च बढी भएकाले किसानलाई आत्मनिर्भर बनाउन नेपाल सरकारले कृषि औजार अनुसन्धान केन्द्र वीरगञ्जमार्फत अनुदानमा मेसिन उपलब्ध गराई ट्र्याक्टरमार्फत खेती गराउन थालिएपछि उत्पादन र उत्पादकत्वमा समेत वृद्घि भएको वरिष्ठ वैज्ञानिक तथा प्रमुख सचिनकुमार मिश्रले राससलाई बताए । 

न्यूनतम जोताइ प्रविधिबाट लगाइएको गहुँ र चारपांग्रे ट्र्याक्टरबाट चल्ने मकै लगाउने मेसिन किसानका लागि वरदान सावित भएको छ । पर्सा जिल्लाको पर्सागढी–१ मनवाका अगुवा किसान अनिरुद्घ चौधरीले न्यूनतम जोताइ प्रविधि र पावर टिलर मेसिनबाट गहुँ खेती गर्दा कम लगानीमा बढी उत्पादन लिन सकिने भएकाले यस वर्ष १५ कट्ठामा आधुनिक प्रविधिबाट गहुँ खेती गरिएको बताउनुभयो । 

जितपुरसिमरा उपमहानगरपालिका–११ खेस्रौलका किसान दम्पती परमानन्द चौधरी र राजकुमारी चौधरीले यस वर्ष पाँच बिघामा मकै खेती गरेका छन् । त्यहाँका तीन जना किसानले सात बिघामा मकै खेती गरेका छन् । एमएन ९ सय ८१ जातको लहलहाउँदै मकै देखाउँदै चौधरी दम्पतीले भने– मेसिनबाट मकै खेती गर्दा सबै खर्च काटी प्रतिकट्ठा रु एक लाख नाफा हुने गरेको बताए । 

कृषि औजार अनुसन्धान केन्द्र वीरगञ्जले समय समयमा किसानलाई आधुनिक प्रविधिबाट खेती गरिएको ठाउँमा फिल्ड भ्रमण गराउने गरेको र मेसिनबाट गरिएको खेतीले उत्पादन राम्रो भएको देखेर बारा, पर्साका किसान मेसिनबाट खेती गर्नेतर्फ आकर्षित हुँदै आएको छ । रासस