काठमाडौं । ब्याटिङ लाइनअफ फेरि एक पटक असफल हुँदा नेपाल नेदरल्याण्ड्ससँग ४५ रनले पराजित भएको छ र विश्वकप छनोटमा आठौं भएको छ ।

 

एकदिवसीय मान्यता पाइसकेको नेपालका लागि सातौं स्थानका लागि भएको खेल प्रतिष्ठाको लडाइँ थियो । तर, ब्याटिङमा पुरानै समस्या दोहोरिँदा हारका साथ प्रतियोगिता टुंग्यायो ।

 

१९० रनको लक्ष्य पछ्याएको नेपालले ४४.४ ओभरमा सबै विकेट गुमाएर १४४ रन मात्र बनाउन सक्यो ।

 

नेपालको सुरुवात राम्रो रहेन । ओपनर ज्ञानेन्द्र मल्ल मात्र ४ रनमा आउट भए, जतिबेला टिमको स्कोर मात्र ११ रन थियो । थप २२ रन जोड्दा अर्का ओपनर अनिलकुमार साह पनि ८ रनमा आउट हुन पुगे ।

 

तेस्रो विकेटका रुपमा कप्तान पारस खड्का २२ रनमा आउट भए,जतिबेला नेपालले ५१ रन बनाएको थियो । थप ९ रन जोड्दा आरिफ शेख ५ रमा आउट भए भने रोहितकुमार पौडेलले खाता नै खोल्न सकेनन् । दिपेन्द्र सिंह ऐरी २५ रनमा पभेलियन फर्किए । सातौं विकेटका रुपमा शक्ति गौचन आउट हुँदा नेपालको स्कोर ७६ रन मात्र थियो ।

 

सोमपाल कामी र करण केसीले सातौं विकेटका लागि ३१ रनको साझेदारी गरे । तर, करण १३ रामा आउट हुन पुगे । राम्रो पारी खेल्ने प्रयासमा रहेका सोमपाल कामी नवौं विकेटका रुपमा ३६ रन बनाएर पभेलियन फर्किए ।

 

यसअघि टस जितेको ब्याटिङ रोजेको नेदरल्याण्ड्सले ५० ओभरमा ८ विकेट गुमाएर १८९ रन बनायो । उसको पनि सुरुवात राम्रो थिएन र ८७ रन जोड्दा ५ विकेट गुमाइसकको थियो तर, पछिल्ला क्रममा ब्याट्सम्यानले सम्हालिएर खेले ।

 

छैटौं विकेटका लागि बास डि लिड र इडवाड्सले ४४ रनको साझेदारी गरे । इडवार्ड २५ र लिड ३६ रनमा आउट भए । तर, नवौं विकेटका लागि पिटर सिलर र शेन स्नाटरले नवौं विकेटका लागि ३७ रनको साझेदारी गरे ।
दुबैले समान २५/२५ रन बनाए ।

 

नेपालका सोमपाल कामीले ४ विकेट लिए भने ललित नारायण राजवंशी र सन्दिप लामिछानेले २-२ विकेट हात पारे । प्रतियोगितामा पहिलो पटक मौका पाएका भेट्रान बलर शक्ति गौचनले १ विकेट आफ्नो नाममा लेखाएका छन् ।

 

एकदिवसीय मान्यता पाइसकेको नेपालका लागि आजको खेल प्रतिष्ठाको लडाइँ मात्र हो । यद्यपि आजको नेपालको खेल एकदिवसीयमा पर्दैन । नेपालले पाएको एकदिवसीय मान्यता विश्वकप छनोट प्रतियोगितापछि मात्र लागू हुनेछ ।