मोहमद सलाहले ४ गोल गरेपछि प्रिमियर लिग अन्तर्गत शनिवार भएको खेलमा तेस्रो स्थानको लिभरपुलले वाटफोर्डलाई ५-० ले पराजित गरेको छ।

 

घरेलु मैदान एनफिल्डमा भएको खेलमा लिभरपुलका लागि रोवर्टो फिर्मिनोले अर्को गोल गरे। खेलको चौथो मिनेटमै गोलको खाता खोलेका सलाहले ४३औँ मिनेटमा दोस्रो गोल गरे। ७७औँ मिनेटमा तेस्रो गोल गर्दै ह्याट्रिक पुरा गरेका सलाहले ८५औँ मिनेटमा चौथो गोल गरे।

 

प्रिमियर लिगमा सलाहले एकै खेलमा चार गोल गरेको यो पहिलो पटक हो भने लिगमा पहिलो ह्याट्रिक समेत हो। यस सिजन प्रिमियर लिगमा सहालको गोलसंख्या २८ पुगेको छ। यस्तै सबैखाले प्रतियोगितामा गरेर सलाहले लिभरपुलका लागि ३६ गोल गरिसकेका छन्। प्रिमियर लिगमा ह्याट्रिक गर्ने सलाह पहिलो इजिप्टियन खेलाडी समेत बनेका छन्।

 

जितपछि ३१ खेलबाट ६३ अंकम जोडेको लिभरपुल तेस्रो स्थानमा यथावत छ र एक खेल कम खेलेको म्यानचेष्टर युनाइटेड भन्दा अझै २ अंकले पछि छ। ३० खेलबाट ८१ अंक जोडेको म्यानचेष्टर सिटी शीर्ष स्थानमा छ।