फ्रेन्च कपको क्वाटरफाइनल खेलमा पेरिस सेन्ट जर्मन पीएसजीले मार्सेलाई ३–० को गाेल अन्तरले हराएको छ । पीएसजीको जितमा एन्जल डि मारियाले दुई गोल गरे ।

 

पीएसजी आफ्नो स्टार खेलाडी नेयमारबिनै मैदानमा उत्रेको थियो । नेयमार लिगमा मार्सेविरुद्धकै खेलमा घाइते भएका थिए । नेयमारले शल्यक्रिया गर्ने भएकाले उनले थप दुई महिना खेल गुमाउने छन् । तर उनको स्थानमा सुरुवाती ११ मा खेलेका एन्जल डि मारियाले दुई गोल गर्दै नेयमारको उपस्थिति खड्किनै दिएनन् ।

 

डि मारियाले पहिलो हाफको अन्तिम मिनेटमा गोल गर्दै टोलीलाई अग्रता दिलाएका थिए । त्यस्तै दोस्रो हाफ सुरु भएको केही मिनेटमै डि मारियाले अग्रता दोब्बर बनाए । खेलको ८१ औं मिनेटमा स्ट्राइकर एडिन्सन काभानीले गोल गर्दै पीएसजीको फराकिलो जित सुनिश्चित गरे ।

 

यो जितसँगै पीएसजी फ्रेन्च कपको सेमिफाइनलमा प्रवेश गरेको छ । अब उसले शनिबार लिगमा ट्रोयेसको सामना गर्ने छ भने मंगलबार राति महत्त्वपूर्ण च्याम्पियन्स लिग खेलमा रियल म्याड्रिडको सामना गर्ने छ ।