विराटनगरमा शनिबारदेखि सुरु भएको विराट गोल्डकपमा आयोजक मोरङ–११ ले विजयी सुरुवात गर्दै क्वार्टरफाइनल प्रवेश गरेको छ। मोफसलमा पहिलो पटक आयोजना गरिएको दिवा तथा रात्रिकालीन (डे–नाइट) फुटबल प्रतियोगिताको उद्घाटन प्रदेश १ का मुख्यमन्त्री शेरधन राईले गरेका थिए। 

 

स्थानीय सहिद रंगशालामा भएको उद्घाटन खेलमा मोरङ–११ ले भुटानको थिम्पु फुटबल क्लबलाई २–० गोल अन्तरले पराजित गरेको छ। मोरङको जीतमा भुवन बस्नेत र निशान लिम्बूले गोल गरे। मोरङका तर्फबाट खेलको ६० मिनेटमा बस्नेतले गोल गर्दै टोलीलाई अग्रता दिलाएका थिए। 

 

यस्तै अतिरिक्त समयमा निशान लिम्बूले गोल गर्दा मोरङ २–० गोल अन्तरले विजयी बन्यो। मोरङका प्रशिक्षक पारश चौधरीले खेलाडीले उत्कृष्ट प्रदर्शन गर्दा परिणाम सोचेअनुरुप नै भएको बताए। खेलको ‘म्यान अफ दी म्याच’ मोरङका निशान लिम्बू घोषित भए। 

 

आजको खेल संकटा फुटबल क्लब र भारतको मोहम्मेदन स्पोर्टिङ क्लबबीच हुनेछ।