काठमाडाैं । स्पेनिस ला ला लिगा फुटबलमा एथ्लेटिको मड्रिड सोसीडाडसँग ३ – ० ले पराजित भएको छ ।  घरेलु मैदानमा बिहिबार राति भएको खेलमा रियल सोसीडाडलाई जित दिलाउन जुवान्मीले दुई गोल गरे । 

 

यस्तै एक गोल विलियन जोसेको नाममा रह्यो । खेलको अन्तिम समय सम्हालिन नसक्दा एथ्लेटिकोलाई रियल सोसीडाडले फराकिलो अन्तरले हराएको हो । पहिलो हाफको २७ औं मिनेटमा जोसेले गोल गर्दै घरेलु टोलीलाई सुरुवाती अग्रता दिलाएका थिए । 

 

दोस्रो हाफको अन्तिम १० मिनेटको समयमा जुवान्मी खेलमा चम्किए । खेलको ८० औं मिनेटमा जुवान्मीले गोल गर्दै रियल सोसीडाडलाई २ – ० को अग्रता दिलाए । त्यसपछि खेलको ९० औं मिनेटमा जुवान्मीले व्यक्तिगत दोस्रो गोल गर्दै घरेलु टोलीलाई ३ – ० को सहज जित दिलाए ।

 

यो जितसँगै रियल सोसीडाडले लिगमा ३३ खेलबाट ४३ अंक जोडेको छ । रियल सोसीडाड लिगको ११ औं स्थानमा रहेको छ ।  यता घरेलु टोलीसँगको हारसँगै एथ्लेटिको मड्रिडले बार्सिलोनाविरुद्ध अंक दुरी घटाउने मौका गुमाएको छ ।

 

लिगको दोस्रो स्थानमा रहेको एथ्लेटिकोले ७१ अंक जोडेको छ । शीर्ष स्थानको बार्सिलोनाको ८३ अंक रहेको छ । एथ्लेटिकोको हारसँगै ला लिगाको उपाधि जित्न बार्सिलोनालाई एक खेलको जितले पुग्ने भएको छ ।