च्याम्पियन्स लिगमा एक वर्षभन्दा बढी समयपछि लुइस स्वारेजको गोलसँगै बार्सिलोनाले रोमालाई ४-१ ले हराएको छ। 

च्याम्पियन्स लिगअन्तर्गत घरेलु मैदान नउ क्याम्पमा भएको पहिलो लेगको क्वार्टरफाइनलमा बार्सिलोनाले प्रभावशाली अग्रता कायम गर्‍यो।

बार्सिलोनाले दुई आत्मघाती गोल उपहार पाएको थियो। पहिलो गोल डेनियर डी रोसीले क्लियरको प्रयासमा आफ्नै पोष्टमा गोल गर्दा बार्सिलोनाले अग्रता बनायो। 

लियोनल मेसीको प्रहारलाई उनले रोक्ने कोसिस गरेका थिए। पहिलो हाफमा एक गोलको अग्रता कायम गरेको बार्सिलोनाले दोस्रो हाफमा थप ३ गोल सम्भव गर्‍यो। 

५५ औं मिनेटमा कोस्तास मनोलसले अर्को आत्मघाती गोल उपहार दिए। तेस्रो गोल जेरार्ड पिके र चौथो गोल लुइस स्वारेजले गरे। रोमाका लागि इडन जेकोले एक गोल फर्काए। 

२०१४-१५ पछि बार्सिलोना च्याम्पियन्स लिगको सेमिफाइनल पुग्न सकेको छैन्। बार्सिलोनाले घरेलु मैदानमा जारी सिजन २१ मध्ये २० खेलमा जित निकालेको छ।