कृष्ण धमला, नेत्रविक्रम चन्द विप्लव नेतृत्वको नेकपाका पोलिटब्यूरो सदस्य हुनुहुन्छ । यो पार्टीले प्रहार गरिरहेको बम, चन्दा प्रकरण, नेपाल बन्दका कार्यक्रम आदिबारे नेपालआजले नेता धमलासँग कुराकानी गरेको छ । कुराकानीका क्रममा धमलाले भन्नु भएको छ कि बम भनेको कुनै हतियार नै होइन । तर चुनावको बेला पड्किएका बमहरु आफ्नै पार्टीले पड्काएको हो । उहाँले अन्तर्वार्ताका क्रममा व्यक्त गर्नुभएको धारणाको मूल सार निम्नानुसार छन्: 

‘हाम्रो पार्टी भूमिगत होइन, छैन । नेकपाको आठौं महाधिवेसनपछि हामीले भूमिगत भन्ने शब्द प्रयोग नगर्ने नीति लिएका छौं । हामी अर्धभूमिगत पनि होइनौं । खुला छौं, जनताको बीचमा छौं । भूमिगत भन्ने शब्द प्रयोग गर्दा राज्यले बढी दमन गर्ने भएकोले त्यो शब्द नै नराखेका हौं । 

 

हामीले १० वर्षे जनयुद्ध गरेका पनि हौं । तर त्यो बेला मानिसहरु जंगलमा बसेका छन् माओवादीहरु भन्ने गर्थे । जनताको बीचमा भ्रम छर्न जंगलमा भन्ने गर्थे । 

हाम्रा महासचिव पनि जनताकै बीचमा हुनुहुन्छ । अरु पार्टी र हामीमा अलिकति फरक छ । हामी यो सत्ता पल्ट्याएर जनगणतन्त्र र वैज्ञानिक समाजवादी स्थापित गर्न चाहन्छौं । हामीविरुद्ध राज्यले युद्धको ऐलान गरेजस्तो गरेको छ । खुला रुपमा आउन हामीलाई राज्यले गरिरहेको छ । 

---

हामीलाई बम हान्ने गरेको आरोप लगाउनु नै बेकार हो । किनभने बम भनेको हतियार नै होइन । हतियारको वर्गमै पर्दैन । खासमा अहिले पड्कीरहेका बमहरु जनताको स्वाभाविक प्रतिरोध हो । उत्पिडनविरुद्धको प्रतिक्रिया हो –बम । यी सांकेतिक हुन्, जनताले पड्काएका हुन् । 

अहिले प्रतिक्रियावादी वा विरोधीहरुले अर्को ढंगले व्याख्या गर्ने र जनतामा भ्रम छर्ने काम भइरहेका छन् । तर जनताले चाहे भने जस्तो सुकै शक्तिशाली सत्ता पनि पल्टाइदिन्छन् । जनताविरुद्ध काम हुन्छ भने स्वभाविक रुपमा आक्रोश पोख्छ । 

चुनावका दौरान जति पनि बम पड्किए, त्यो श्रृंखलाको नेतृत्व हामीले नै गरेको हो । यो प्रतिक्रियावादी सत्ताले परिवर्तन स्वीकार गर्दैन । 

हाम्रो पार्टी भनेको क्रान्तिकारी पार्टी हो । जनताको आवाज बोक्ने दल हो । झुठा मुद्धा लगाउने, जेलमा सडाउने, दमन गर्ने काम राज्यले गरिरहेको छ । तर हामीले जनताका आवाज बोकेका मात्रै हौं । १० वर्षे जनयुद्धमा हामीले जे खोजेका थियौं, त्यो कुरा अहिलेसम्म पूरा भएन । प्रचण्ड–बाबुरामले जस्तो धोका दिन सकेका छैनौं । संसदीय व्यवस्था अस्वीकार गरेर जनयुद्ध गरियो, अहिले त्यही व्यवस्थामा प्रचण्ड बाबुराम गए । 

शान्ति सम्झौताको भावना र मर्म पनि लागू गरिएन । प्रचण्ड–बाबुरामलाई किनेर समस्या समाधान हुँदैन भनेका थियौं । धोका र गद्दारीविरुद्ध हामीले संघर्ष गरिरहेका छौं । हामी त वैकल्पिक शक्ति हौं । दूनियाँका बलिया तानाशाह त ढलेका छन् भने यो सत्ता केही होइन । 

 

हामीले संसदवादविरुद्ध लडेका थियौं । 

 

हाम्रा महासचिवले विदेशी जासुसलाई कहिले भेट्नु भएको छैन । विदेशी शक्तिलाई भेट्नु भएको होला तर जासुसलाई कहिले पनि भेट्नु भएको छैन । 
शिक्षामा व्यापारिकरण भइरहेको छ । हामीले शिक्षामा भइरहेको व्यापारिकरण भइरहेको छ । हाम्रा महासचिवलाई बद्नाम गर्ने काम पनि भइरहेको छ । महासचिवका छोरा मेडिकल कलेजमा पढ्ने अनि जनताका  छोराछोरी पढ्ने संस्थामा बन्द गर्ने काम हाम्रो पार्टीले गर्यो भनेर भ्रम फैल्याइएको छ । त्यो सत्य होइन । भ्रम छर्ने प्रयास हो । 

देशमा राष्ट्रघात, जनघात,नवऔपनिवेशीकरण भइरहेको छ, सीमा मिचिएको छ, भारतीय साम्राज्यवादी शक्तिविरुद्ध हामीले जनतालाई जागरुक बनाउन बन्दको आह्वान गरेका हौं । 

अरुण तेस्रो सस्तो परियोजना भारतलाई दिइयो । अपर कर्णाली भारतलाई दिइयो । हाम्रो सार्वभौमसत्ता, अखण्डतामा आँचआउने काम भएपछि हामी बन्दको आह्वान गर्छौं । 

हामी अन्तर्राष्ट्रियवादमा विश्वास गर्छौं । जसका कारण विदेशी भूमिमा बसेर पनि हामी नेपालमा आन्दोलन गर्न सक्छौं । भारतलाई हामी साम्राज्यवादी भन्ने गरेका छौं । यो पार्टीको घोषित नीति हो । भारतले गोवा खायो, कश्मिर खायो, सिक्किम खायो । भूटानलाई खान लागेको छ । छिमेकीमाथि पनि असमान सन्धिसम्झौता लादेको छ । नेपालको कालापानीमा भारतको सेना छ । बंगलादेश, पाकिस्तान, श्रीलंकासबैतिर उसको उत्पिडन देखिन्छ । यसकारण उसलाई साम्राज्यवादी शक्ति भनेका हौं ।  

अहिले त हामी कतै लुकेका छैनौं । जनताको बीचमा छौं । हाम्रा महासचिव पनि भारतमा लुक्नु भएको छैन ।’

(नेता धमलासँग गरिएको कुराकानीको दोस्रो भाग चाँडै प्रकाशन हुनेछ ।– सम्पादक)

विप्लव नेत्रविक्रम चन्द कृष्ण धमला