काठमाडौं।  त्रिवि शिक्षण अस्पताल महाराजगन्जमा कलेजो प्रत्यारोपण गर्ने तयारी अन्तिम चरणमा पुगेको छ । यसअघि भक्तपुरस्थित मानव अंग प्रत्यारोपण केन्द्रले दुई वर्षअघि कलेजो प्रत्यारोपण सेवा सुरु गरेको थियो ।

 

कलेजो प्रत्यारोपणका लागि एघार करोडको लागतमा अत्याधुनिक पोस्ट अपरेटिभ आइसीयु निर्माण भइसकेको छ ।

सेवा सुरु गर्न त्रिवि शिक्षण अस्पतालले ग्यास्ट्रोइन्टेस्टाइनल हेपाटोविलियरी प्याङक्रियाटीक एण्ड लिभर ट्रान्सप्लान्ट सर्जन डा.रमेशसिंह भण्डारी नेतृत्वको चिकित्सकीय टोली तयारी अवस्थामा राखेको छ । 

अस्ट्रेलियाबाट प्रत्यारोपणमा दुई वर्षे तालिम लिएका भण्डारीसहित डा.अमित श्रेष्ठ, डा.सुवाश आचार्यलगायतको समूहले कलेजो प्रत्यारोपण गर्ने अस्पतालका कार्यकारी निर्देशक प्रा.डा.दीपकप्रकाश महराले जानकारी दिए ।

प्रत्यारोपण सेवा सुरु गर्न झण्डै २२ जनाको टोली तयारी अवस्थामा छ । उनीहरूले अष्ट्रेलिया, अमेरिका र भारतबाट तालिम लिइसकेका छन् ।

कार्यकारी निर्देशक डा.महराका अनुसार प्रत्यारोपण गर्न चाहने २०-२२ जना बिरामी आइसकेका छन् ।

भारत, सिंगापुर र अष्ट्रेलियाका विशेषज्ञको प्राविधिक सहयोगमा नेपाली सर्जनले प्रत्यारोपण गर्ने छन् । यसका लागि ती देशसँग समन्वय भइरहेको छ । 

करिब १५ जना बिरामीको कलेजो प्रत्यारोपण गर्दा विदेशीको सहयोग लिने योजना शिक्षण अस्पतालको छ । नेपाली चिकित्सकले महिनामा एक जना बिरामीको कलेजो प्रत्यारोपण गर्ने योजना बनाएका छन् ।

कलेजो प्रत्यारोपण  त्रिवि शिक्षण अस्पताल