काठमाडौं । न्युज ट्वान्टी फोर टेलिभिजनको चर्चित कार्यक्रम ‘सीधा कुरा जनतासँग’का कार्यक्रम सञ्चालक रबि लामिछानेले ‘मिराकल ब्वाय’भनेर प्रस्तुत गरेका ११ वर्षका अबिरल पोख्रेलको मामिलालाई एक बरिष्ठ चिकित्सकले हावादारीको संज्ञा दिएका छन् । 

 

रबि लामिछानेले सीधा कुराकोे २५० औं भागमा अद्भूत र विलक्षण प्रतिभा भएका बालक भन्दै अविरललाई आफ्नो शोमा ल्याएका थिए । अविरलको आँखामा पट्टि बाँधेर उनलाई फरक फरक रङका वस्तु चिन्न लगाइयो । उनले पट्टी बाँधेकै अवस्थामा ती वस्तुका रङ भनिदिए । मोबाइलको स्क्रिन छामेको भरमा उनले फोटो कसको हो भन्ने पत्ता लगाए । त्यति मात्रै होइन उनले कागजमा छापिएको अक्षर पनि छोएरै पढिदिए । 

 

आजसम्मको मेडिकल साइन्सको अध्ययनका क्रममा कहिल्यै यस्तो सेन्स भएका मानिस कतै भेटिएका छन् ? नेपालका वरिष्ठ चिकित्सक डा. जागेश्वर गौतम भन्छन्, ‘आजसम्म यस्तो कतै पनि भेटिएको छैन । दावी गर्नेहरु संसारमा छन् तर यस्तो मिराकल आजसम्म भएको रेकर्ड छैन । किनभने देख्ने भनेको आँखाले हो, औंलाले होइन । यदि ती बालकको आैंलाले देख्छ भने उसको औंलामा आँखामा हुने अंगहरु (नानी, रेटिना आदि) हुनुपर्छ । नत्र सम्भव छैन ।’

 

डा. गौतमका अनुसार कुनै पनि वस्तुबाट उत्पन्न हुने प्रकाश हाम्रो आँखासम्म आउँछ, आँखाले वस्तुको आकृति दिमागसम्म पुर्याउँछ, अनि दिमागले विश्लेषण गरेर वस्तु चिन्छ । उनी भन्छन्, ‘अब भन्नुस्, औंलाको भरमा कसरी वस्तु चिन्न सकिन्छ ?’

डा. गौतमले आफूले सो कार्यक्रम नहेरेको तर विज्ञानको दृष्टिले यस्तो सम्भव नरहेको उल्लेख गरे । उनले भने, ‘कसले के के नौटंकी गर्छन् त्यता नजाउँ । पट्टी बाँध्न मलाई दिनूस् अनि रवि लामिछानेको कार्यक्रममा बालकलाई लैजानूस् न । पर्दा खुलिहाल्छ ।’

 

डा. गौतमले बालबालिकालाई सिर्जनशील काममा लगाउनु पर्नेमा झुठो प्रचारबाजीमा उपयोग गर्ने उनका अभिभावक गलत रहेको टिप्पणी गरे । उनले भने, ‘यस्ता हावादारी काम गर्न आफ्ना बालबालिकालाई उक्साउने अभिभावक गलत हुन् । आमसंचार माध्यमले पनि राम्रो परीक्षण गरेर यस्ता विषयवस्तु  प्रशारण  गर्नु पर्छ । यो मेरो सुझाव हो ।’

 

कृष्णदासजी महाराजका सम्बन्धमा पनि डा. गौतमले टिप्पणी गरेका थिए । गौतमले त आफूले बनाएको खाल्डो र बाकसमा अन्नपानी बिना केही दिन बसेर देखाउन कृष्णदासलाई चुनौती दिएका थिए । कृष्णदासले डा. गौतमको चुनौती स्वीकार गर्न सकेनन् ।

 

यो मामिलामा कुरा गर्न नेपालआजले अविरलका बाबुको नम्बरमा फोन गरेको थियो । तर फोन उठेन ।