काठमाडौं । स्थानियले दिएकाे सूचनाका अनुसार पछ्याएकाे प्रहरीले बसुन्धाराको कसौडी खाजाघरमा दुर्इजनालार्इ पेस्ताेलसहित पक्राउ गरेकाे छ । शुक्रबार मध्यान्ह स्थानियले सूचना दिनासाथ त्यस तर्फ हिडेकाे महानगरीय प्रहरी वृत महाराजगञ्जकाे टाेलीले  बसुन्धारास्थित साउथ वेस्टर्न कलेजमा कक्षा ११ मा पढ्ने १८ वर्षीय अभिषेक बराल र कक्षा १२ मा पढ्ने बिनोद गुरुङलाई पक्राउ गरेको छ ।

 

रेष्टुरेण्टमा बसेर गोली हान्ने कुरा गरिरहेका दुई युवालाई नियन्त्रणमा लिएर प्रहरीले बडी सर्च गर्दा एउटा पेस्तोल भेटियो । उक्त पेस्तोलमा लेखिएको थियो, ‘९ एमएम ग्रेटा, मेड ईन युएसए ।’

 

तर, सक्कली ‘नाईन एमएम ग्रेटा’ जस्तो देखिने उक्त पेस्तोल नक्कली रहेको काठमाडौं प्रहरीले जनाएको छ । बसुन्धारास्थित यती पार्टी प्यालेसमा क्याम्पसको कार्यक्रम भईरहेको बेला बराल र गुरुङले नजिकैको रेष्टुरेण्टमा नक्कली पेस्तोल बोकेर गोली हान्ने कुरा गरेको बताईएको छ ।

 

प्रहरीले विनोद र अभिषेकले चढेको बा. ९२ प १७०८ नम्बरको स्कुटर पनि बरादम गरेको छ । घटनाबारे अनुसन्धान भईरहेको प्रहरीले जनाएको छ ।