काठमाडौं । चार वर्षपछि हुन लागेकोे शहीद स्मारक ‘ए’ डिभिजन लिग फुटबल प्रतियोगिताको विजेता टोलीले ५० लाख रुपैयाँ पाउने भएको छ । 

 

 

अखिल नेपाल फुटबल सङ्घ (एन्फा) द्वारा आइतबार काठमाडौंमा आयोजित पत्रकार सम्मेलनमा विजेता टोलीलाई ५० लाख रुपैयाँ दिने निर्णय भएको एन्फाका महासचिव इन्द्र्रमान तुलाधरले जानकारी दिए । प्रतियोगितामा उपविजेता हुने टोलीले ३५ लाख रुपैयाँ पाउनेछन् भने तेस्रो हुनेले २५ लाख पाउनेछन् । 

 

 

चौंथोले १५ लाख, पाँचांले सात लाख र छैटौंले पाँच लाख रुपैयाँ पाउने छन् । प्रतियोगितामा फेयर प्ले टोलीले एक लाख रुपैयाँ पाउने छन् । प्रत्येक खेल जितेबापत एन्फाले क्लबलाई ५० हजार रुपैयाँ दिनेछ भने म्यान अफ दि म्याच घोषित हुने खेलाडीले १० हजार रुपैयाँ प्राप्त गर्नेछन् । 

 

 

लिग अवधिभर उत्कृष्ट खेल प्रर्दशन गर्ने मिड फिल्डर, डिफेन्डर, फरवार्ड, गोलकिपर र प्रशिक्षकले एक एक थान मोटरसाइकल पाउनेछन् । तीन विभागीयसहित १४ टोली सहभागी उक्त प्रतियोगिता आगामी असोज १३ गतेदेखि पुस महिनासम्म चल्नेछ । 

 

 

प्रतियोगितामा नेपाल पुलिस क्लब, सशस्त्र प्रहरी बल (एपिएफ), त्रिभुवन आर्मी, थ्री स्टार, मनाङ मस्र्याङ्दी, जावलाखेल युथ, फ्रेन्ड्स, सङ्कटा, मछिन्द्र, सरस्वती युथ, च्यासल युथ, न्युरोड टिम (एनआरटि) ,ब्रिगेड ब्वाइज र हिमालयन शेर्पा क्लबले प्रतिस्पर्धा गर्नेछन् । 

 

 

उक्त प्रतियोगिताको लागि क्लबहरुले १८ देखि ३५ खेलाडी अनुबन्धित गर्न सक्ने एन्फाले जनाएको छ । जसमा चार विदेशी खेलाडी राख्न पाउने छन् । लिग विजेता टोलीले एएफसी एसियन कप फुटबल २०१९ मा सहभागिता जनाउन पाउनेछन् । 

 

 

प्रतियोगितामा उत्कृष्ट घोषित हुने फरवार्ड, डिफेन्डर , मिडफिल्डर, गोलकिपर र प्रशिक्षले एक एक थान बाइक पाउनेछन् । यसपटकको लिगमा म्याच फिक्सिङ रोक्न एन्फाले नयाँ कमिटीसमेत गठन गरेको छ भने सिसी क्यामेराको जडानसमेत गरिने एन्फाले जनाएको छ । 

 

 

लिग तयारीको लागि एन्फाले क्लबलाई २० लाख रुपैयाँ उपलब्ध गराउने छ । उक्त प्रतियोगिताको लागि पाँच करोड ८० लाख रुपैयाँ खर्च लाग्ने एन्फाले जनाएको छ । प्रतियोगिताको खेल भने सातदोबाटोस्थित एन्फा कम्प्लेक्स र हल्चोकस्थित सशत्र प्रहरी बलको (एपिएफ) मैदानमा हुनेछ । 

फुटबल प्रतियोगिता शहीद स्मारक ‘ए’ डिभिजन लिग