काठमाडौ । विवेकशील साझा पार्टीले सातवटै प्रदेशका उत्प्रेरक एवं संगठनलाई प्रशिक्षण दिएको छ । शनिबार र आइतबार देशभरिका १५० जना उत्प्रेरक नेतालाई कार्यक्रममा सहभागी गराइएको प्रवक्ता डा सूर्यराज आचार्यले जानकारी दिए ।

 

 

कार्यक्रमलाई सम्बोधन गर्दै संयोजक रवीन्द्र मिश्रले वैकल्पिक राजनीतिका लागि आधार फराकिलो हुँदै गएकाले नेतृत्व गर्न लायक सङ्गठन निर्माणमा जुट्न उत्प्रेरकलाई आग्रह गरे । 

 

अर्का संयोजक उज्वल थापाले वैकल्पिक राजनीतिका लागि संगठनलाई पनि कुशलतापूर्ण विधिले अघि बढाइने बताए । सो अवसरमा प्रवक्ता आचार्यले विवेकशील साझा पार्टीको आधारभूत वैचारिक, राजनीतिक तथा अर्थनीतिका बारेमा प्रशिक्षण दिए ।

 

 

वैकल्पिक राजनीतिका बारेमा लेख्दै र बोल्दै आएका केन्द्रीय सदस्यद्वय केशव दाहाल र गोविन्द नारायणले वैकल्पिक राजनीतिमा युवाको भूमिकाबारे जानकारी गराएका थिए । 

 

 

पार्टी सङ्गठन विभाग प्रमुख मुमाराम खनालले पार्टीको वैकल्पिक संरचना, आन्तरिक लोकतान्त्रिक अभ्यासको विधि, विधानको कार्यान्वयन तथा तीनमहिने सङ्गठन बिस्तार अभियानको महत्वमाथि प्रकाश पारे ।

 

 

पार्टीका केन्द्रीय सदस्य प्रकाशचन्द्र परियारले समावेशिता, सुबुना बस्नेतले उद्यमशीलता, शशिविक्रम कार्कीले सामाजिक अभियान, किशोर थापाले पार्टीको अनुशासन तथा सुशासन र अर्जुनसिंह ठकुरीले पार्टीको आन्तरिक व्यवस्थापनबारे प्रशिक्षण दिएको जारी विज्ञप्तिमा उल्लेख छ । 

विवेकशील साझा पार्टी सातवटै प्रदेश उत्प्रेरक एवं संगठन प्रशिक्षण