‘टालाटुली बटुली’ की यी गायिका भन्छिन्, ‘पहिलो पटक गीत गाउँदा मेरा बुवा थरर्र काँप्नुभयो’(भिडियाेसहित)
काठमाडौं । ९० को दशकमा बालबालिकाको स्कुल, घर सबैतिर सर्वाधिक गुञ्जिने गीत थियो, ‘टालाटुली बटुली कत्ति राम्री पुतली’ । हिजोआज यो गीत कमै गुञ्जिन्छन् । तर, ९० को दशकसम्मका औसत केटाकेटीहरूले यो गीत बिर्सिएका छैनन् । उनीहरूलाई यो गीतले अहिले पनि बालापनको यादहरूमा चुर्लुम्म डुबाउँछ ।
अझ ‘कपुरी क’ बोलको गीत त पढाउनकै लागि पनि प्रयोग ल्याइन्छन् । गाउँघरतिर अझै पनि यी गीतहरू गुञ्जिन छोडेका छैनन् ।
यही गीत गाउने बुटवलकी एन्जिला रेग्मी अहिले चर्चित पप गायिका भइसकेककी छन् । नौ वर्षको उमेरदेखि नै सांगीतिक यात्रा सुरु गरेकी उनले दर्जनौं गीतमा आवाज दिइसकेकी छन् । गायिका रेग्मीका चर्चित गीतमध्ये ‘कपुरी क’, ‘दिलको भित्तामा’ सबैभन्दा अगाडि आउँछ ।
युकेजीमा पढ्दा स्कुलको शिक्षकसँग सुनोल भन्ने ठाउँमा गीत गाउन गएकी थिइन् उनी । शिक्षकले बुवालाई पनि बोलाएका रहेछन् । तर यो कुरा एन्जिलालाई थाहा थिएन । छोरीले मञ्चमा गीत गाएको पहिलो पटक देखेका उनका बुवा छोरीलाई देखेर थरर्र कापेँ । यही दिनबाट उनका बावुले तय गरे कि छोरीलाई संगीत क्षेत्रमा साथ दिनेछु भनेर । बावुले संगीत सिकाउनकै लागि उनलाई बुटवल लगे । त्यहीँबाट सुरु भयो उनको सांगीतिक यात्रा ।
केही समयअघिमात्र रिलिज भएको उनको ‘दिलको भित्तामा’ बोलको गीतले सर्वाधिक लोकप्रियता कमायो । रिलिजको तीन महिनामै उक्त गीत करोड क्लबमा पुग्न सफल भएको थियो । धेरैले उनको गीत चिने पनि उनलाई भने त्यही गीत गाउने गायिका भनेर चिन्दैनन् । तर, उनले गाएका गीत भने नसुन्ने कमै भेटिन्छन् ।
साना नानीहरूदेखि वृद्धवृद्धा उनका गीतमा रमाई रहेका देखिन्छन् । उनले गाएका गीतहरू सुन्दा बाल गीत जस्ता पनि सुनिन्छन् । तर उनका गीत अहिले दर्शकको मनमुटुमा बस्न सफल भएका छन् ।
रेग्मीका गीतहरू बालबालिकासँगै युवा पुस्ताले पनि असाध्यै रुचाएका छन् । गायिका रेग्मी दर्शकको प्रतिक्रियाबाट निकै उत्साहित छन् । उनले भनिन्, ‘मैले सोचेको भन्दा बढी दर्शकबाट माया र साथ पाएकी छु, त्यसैले अगाडि बढ्न अझ उत्साहित छु ।’
सांगीतिक क्षेत्रमा अगाडि बढ्दा रेग्मीलाई सजिलो पक्कै भएन । तर पनि परेपछि मात्रै सुन्दर इन्द्रेणी देखिन्छ भनेजस्तै ती कठिनाइलाई अवसरको रूपमा परिणत गर्दै अहिले उनी एक लोकप्रिय गायिका भएकी छन् ।
तर आफ्ना भोगाइले छोरी मान्छेलाई संगीत र मिडियाको रंगीन दुनियाँमा धेरै कठिनाइ हुने पाठ सिकेकी छन् उनले । कुनै समय कतिपय संगीतकर्मीले दुव्र्यवहार पनि गर्थे उनलाई । चुपचाप त्यसलाई सहनुबाहेक उनीसँग अरू केही उपाय हुन्थेन् । तर पारिवारिक सहायता सबभन्दा महत्वपूर्ण हुने रहेछ । परिवारको सहायताले गर्दा नै आफू अहिले यो स्थानसम्म आएको उनले उल्लेख गरिन् ।
उनले थपिन्, ‘मैले कसैको चरित्र हत्या गर्न खोजेकी होइन । तर जोसँग कला छ त्यो व्यक्तिले आउने दिनमा यस्तो कुराले गर्दा संगीतबाट नै टाढा हुन नपरोस्, उहाँहरूले यस्तो व्यवहार भोग्न नपरोस् भनेर मात्र भनेको हुँ ।’
९ वर्षको कलिलो उमेरमै गायन क्षेत्रमा प्रवेश गरेर पनि होला । अहिले पनि उनी धेरैको नजरमा फुच्ची नै छन् । ‘मायाले धेरैले फुच्ची भनेर बोलाउँछन् । मलाई अहिले पनि धेरैले फुच्ची छौँ भन्छन्, तर अब म बाल गायिका मात्र होइन ठूली भइसकेँ’, उनले भनिन् ।
बाल गीत मात्रै नभएर गायिका रेग्मीले प्रेममा आधारित गीतहरू पनि गाएकी छन् । उनले ‘पिरतीको गोली’, ‘मुटुको धडकन तिमी’ ‘दिलको भित्तामा’ लगायत थुप्रै प्रेम गीतमा स्वर दिएकी छन् ।
खासगरी रेग्मी पप गायिका हुन् । यसका साथै उनलाई डान्सिङ, रोमान्टिक तथा चलचित्रका गीत गाउन मन पर्छ । उनले भनिन्, ‘सबै जनराको गीतहरू गाएको छु तर दर्शकहरूले पप गीत र डान्सिङ नम्बरका गीतहरू बढी रुचाइदिनु भएको छ ।’ यसपालिको तीजमा रेग्मीको आवाजमा ‘मन्त्रपढेँ तिम्रै नामको’ बोलको तीजगीतको भिडियोे पनि सार्वजनिक भएको छ ।
एन्जिला रेग्मी
