काठमाडौं । यूएई क्रिकेट टोलीका कप्तान मोहम्मद नाभिद धनगढी प्रिमियर लिग (डीपीएल) को  महेन्द्रनगर युनाइटेडमा आवद्ध भएका छन् । महेन्द्रनगरले तेस्रो संस्करणका लागि विदेशी खेलाडीको रुपमा नाभिदलाई आफ्नो टोलीमा आवद्ध गरेको हो ।  

 
३१ वर्षिय नाभिद हाल यूएईमा जारी नेपाल र यूएईबीचको शृंखलामा आयोजक टोलीको कप्तानी गरिरहेका छन्। युएईको लागि ३५ एकदिवसीय अन्तर्राष्ट्रिय तथा २३ टि-२० अन्तर्राष्ट्रिय समेत खेलिसकेका उनका नाममा एकदिवसीयमा ५० विकेट तथा टि-२० मा २३ विकेट छन्। महेन्द्रनगर टिमका सहमालिक निरज चन्दले अनुभवी खेलाडी नाभिदको आगमनले टोली बलियो बनेको बताए।  

शरद भेषावकरको कप्तानीमा रहेको महेन्द्रनगर यूनाइटेडमा आरिफ शेख, रोहित पौडेल, अविनाश बोहरा, अमरसिंह रौटेला, सागर ढकाल, दीलिप नाथ, सिद्धान्त लोहनी, शाहब आलम, कुशल मल्ल, दीपेन्द्र चन्द, सन्तोष भट्ट, सुशील खड्का र मोहम्मद नाभिद रहेका छन्।  माघ २६ गते देखि फाल्गुन ११ गते सम्म धनगढीमा आयोजना हुने डीपीएलका हरेक टोलीले अनिवार्य दुईजना विदेशी खेलाडीहरु राख्नुपर्ने प्रावधान छ ।